Шоҳасан Мирзаматовни яна жангга чорлашди, бу чемпионлик жанги бўлиши мумкин!

Аввалроқ, ярим ўрта вазн тоифасида Octagon лигаси чемпиони Магомед Магомедов ўз чемпионлик камарини вакант қолдирган эди. Маълум бўлишича, лига мазкур камар учун Георгий Кичигин ҳамда Шоҳасан Мирзаматов жанг қилишини истамоқда.

"Лига бизга Шоҳасан билан чемпионлик жангини таклиф қилди, чунки Магомедов кетди. Лекин Мирзаматов қочяпти ва бу жангни қабул қилмаяпти. Шундай мухлислар аудиториясига эга инсоннинг ҳақиқий қўрқоқ экани кулгили. Эронлик "жангчи"ни эса менинг шогиртларим ҳам енга олади. Агар Мирзаматовда "дух" бўлмаса, менга исталган жангчини беринг, мен шу камарни қўлга киритишни хоҳлайман!", - дея Шоҳасан ва лига раҳбариятига мурожаат қилди Георий Кичигин.

Маълумот учун, Георгий Кичигин сўнгги бор 27 май куни Octagon 45 мусобақаси доирасида бразилиялик Нилсон Оливейра билан жанг қилиб, зафар қучган эди. У фаолияти давомида ACA, ONE FC каби лигаларда жанг қилган.