Шоҳжаҳон Эргашев жанг оқшомининг жуфтликлари маълум бўлмоқда

"Юнусобод" спорт мажмуасида соат 18:00да бошланадиган профессионал бокс оқшоми ҳамюртимиз Шоҳжаҳон Эргашевга тегишли Shohjahon Promotions промоутерлик компанияси томонидан ташкил этиляпти. Марказий жанг табиийки, айнан Шоҳжаҳон иштирокида кечади ва у шу куни танзаниялик Салиму Женго (16-3-0)га қарши рингга кўтарилади.

Кўпчиликни оқшомнинг бошқа жуфтликлари қизиқтирмоқда. Биз шу мақсадда Шоҳжаҳоннинг ўзи билан боғланиб, айрим маълумотларни олдик. Унинг айтишича, 11 июнь куни ҳамюртимиз Улуғбек Ҳақбердиев (6-0) 10 рундлик жангда беларуслик Дмитрий Атрохов (16-9), россиялик Сергей Воробьев 8 раундлик жангда (10-1) қозоғистонлик Александр Журавский (13-7-1), боксчимиз Ботиржон Зокиров 4 раундлик баҳсда россиялик Александр Салтиков, яна бир рус боксчиси Владимир Мироненко 4 раундлик дебют жангида Али Акедилов (3-0-1)га қарши рингга чиқади. 

11 июнь кунги бокс оқшомида яна бир тажрибали чарм қўлқоп устамиз Жамшид Нажмиддинов ҳам ўзининг узоқ кутилган жангини ўтказади. Бу ҳақида унинг ўзи ҳам Инстаграм саҳифасида хабар қолдирди. Лекин ҳозирча унинг рақиби маълум эмас. Шунингдек, бу сўнгги кард эмас. Ҳали яна 2-3 та жуфтлик кардга киритилади. Шоҳжаҳоннинг ўзи айни пайтда Москва шаҳрида тайёргарлик кўрмоқда ва 5 июнь куни Тошкентга қайтиб келади.