Шон О’Мэлли Нурмагомедов - Сэндхаген жангининг ўтказилишига ишонмаяпти

Хабарингиз бор, 3 август куни БАА пойтахти Абу-Даби шаҳрида UFC on ABC 7 турнири бўлиб ўтади. Оқшомнинг марказий жанги даъвогарлик мақомида бўлиб, унда америкалик Кори Сэндхаген россиялик Умар Нурмагомедовга қарши октагонга чиқади. 

"Умарнинг жанглардан қочиш одати борлиги ҳеч кимга сир эмас. У оз муддат қолганида жангларни бекор қилишни яхши кўради. Агар шу жанг белгиланган муддатида ўтказилса, мен бундан ҳайратда қоламан", - деди чемпион Шон. 

Аслида бу жанг ўтган йилнинг август ойида АҚШнинг Нэшвилл шаҳрида ўтказилган UFC on ESPN 50 турнирининг марказий баҳси мақомида ўтиши керак эди. Лекин ўшанда Нурмагомедов машғулотда жароҳат орттириб олгани учун жанг бекор қолдирилганди. Умарнинг ўрнини эгаллаган Роб Фонтни эса Сэндхаген ҳакамларнинг якдил қарори эвазига мағлубиятга учратганди. 

Бундан уч ой олдин Умар Нурмагомедов бир йиллик танаффусдан сўнг октагонга қайтиб, UFC промоушени дебютанти, қозоғистонлик Бекзат Алмаханни очколар бўйича енгишга муваффақ бўлганди. Шон О’Мэлли эса кейинги чемпионлик ҳимоя жангини рейтингда биринчи ўринни эгаллаб турган грузиялик Мераб Двалишвилига қарши ўтказади. Ушбу жангнинг 14 сентябрь куни Лас-Вегас шаҳрида ташкил этиладиган UFC 306 турнири доирасида ўтказилиши режалаштириляпти.