Singapore International Open. Мағлубиятсиз тур. Гулдона яна бир гроссмейстер билан дуранг ўйнади, қолганларда ғалаба!

А ва В гуруҳларида ташкил этилаётган мусобақада дунёнинг 40 га яқин давлат спортчилари қатори ўзбекистонлик шахматчи қизлар ҳам ўз имкониятини синовдан ўтказяпти. Улар орасида истеъодли шахматчимиз Гулдона Каримова (2115) етакчилар сафида бормоқда. Кеча шахматчимиз оқ доналарда мўғулистонлик гроссмейстер Сумия Билгуун билан муросага келди. 

Кучлилар жам бўлган А гуруҳи баҳсларида қатнашаётган Гулдона 5 имкониятдан 3,5 очко жамғариб, қўшимча кўрсаткичларга кўра 24-ўринни эгаллаб турибди. Ҳиндистонлик Илампарти 5-турдан кейин 4,5 очко билан якка пешқадам бўлиб олди. Шу тургача карвонбоши бўлиб келган россиялик гроссмейстер Володар Мурзин 4 очко билан қўшимча коэфицентларга кўра 2-ўринни банд этган. Яна 19 нафар шахматчи ҳисобида ҳам 4 очкодан бор. 

Бутунжаҳон шахмат Олимпиадасида ўз доскасида кумуш медални қўлга киритган Нодира Нодиржонова (2137) кетма-кет иккинчи ғалабасини қўлга киритди. Тажрибали шахматчимиз оқ доналарда сингапурлик Венката Данешдан устун келиб, очколарини 3 тага етказиб олди. Умида Омонова қора доналарда ўйнашига қарамай, хитойлик Юху Жоуни таслим этди. Қора доналарда ўйнаган Барчиной Шокиржонова ҳиндистонлик Деванш Сингҳни мағлубиятга учратди.  

Бешинчи турда шахматчи қизларимиздан биргина Нилуфархон Имомқўзиева очко йўқотди. У оқ доналарда ҳаракат қилиб, австралиялик Крис Чан билан дуранг ўйнади. Асал Салимова эса қора доналарда ҳиндистонлик Киртикани енгди. 

Олтинчи тур олдидан Барчиной Шокиржонова қўшимча кўрсаткичларга кўра 97, Нодира Нодиржонова 107, Умида Омонова 127, Асал Салимова 150-ўринни эгаллаб турибди.