Sinquefield Cup 2025. Ниҳоят, Нодирбек Абдусатторовда узоқ кутилган ғалаба

Дунёнинг кўзга кўринган ва рейтинги юқори 10 нафар гроссмейстери жам бўлган ушбу мусобақада ҳамюртимиз Нодирбек Абдусатторов (2771) ҳам иштирок этмоқда. Шахматчимиз кетма-кет омадсизликлардан сўнг ниҳоят, мусобақадаги илк ғалабасини қўлга киритди. У оқ доналарда франциялик Алиреза Фирузджани мағлуб этишнинг уддасидан чиқди. 

Гроссмейстеримиз бунгача ўтказилган 7 та учрашувнинг 4 тасида рақибларига имкониятни бой берган, 3 тасида эса дурангга рози бўлганди. Кечаги ғалабадан кейин Нодирбек очколарини 2,5 тага етказиб олди, лекин сўнгги 10-ўриндан тепага кўтарила олмади. Тўққизинчи поғонадан жой олган ва айнан Нодирбекка имконияти бой берган Алиреза ҳисобида 3 очко бор. Амалдаги жаҳон чемпиони Гукеш Доммараджу 3,5 очко билан 8-ўринни банд этган.  

Sinquefield Cup 2025 турнирининг 8-тур қолган барча партияларида дуранг натижа қайд этилди. Турнир жадвалида америкалик Фабиано Каруана ва ҳиндистонлик Рамешбабу Праггнанандҳа 5 очкодан тўплаб, қўшҳокимликни давом эттиришяпти. Америкаликлар Левон Аронян ва Уэсли Со ҳисобида 4,5 тадан очко бор. 

Бугун мусобақада сўнгги 9-тур учрашувлари ўтказилади. Нодирбек Абдусатторов қора доналарда Уэсли Сога қарши баҳс олиб боради. Учрашувлар бизнинг вақт билан соат 22:30да бошланади.