Sinquefield Cup 2025. Нодирбек Абдусатторов "чўкиш"да давом этмоқда

Дунёнинг кўзга кўринган ва рейтинги юқори 10 нафар гроссмейстери жам бўлган ушбу мусобақада ҳамюртимиз Нодирбек Абдусатторов (2771) омадсиз иштирок этмоқда. Шахматчимиз ортда қолган 7 та турда ҳали ғалаба нималигини билмади. Бундай омадсиз иштирокка анчадан бери гувоҳ бўлмаётгандик. 

Гроссмейстеримиз ўтказилган 7 та учрашувнинг 4 тасида рақибларига имкониятни бой берди, 3 тасида эса дурангга рози бўлди. Турнир жадвалида сўнгги 10-ўринни эгаллаб турган Нодирбек кеча ўтказилган 7-турда 9-поғонада борган польшалик Ян-Криштоф Дудага имкониятни бой бериб қўйди. 

Sinquefield Cup 2025 турнирининг 7-турида Уэсли Со амалдаги жаҳон чемпиони Гукеш Доммараджуни, Рамешбабу Праггнанандҳа франциялик Алиреза Фирузджани мағлубиятга учрата олди. Қолган икки партияда кучлар тенг келди. Мусобақа якунланишига 2 тур қолган бир пайтда турнир жадвалида қўшҳокимлик юзага келди. Фабиано Каруана ва Рамешбабу Праггнанандҳа 4,5 тадан очко жамғариб, биринчи ва иккинчи ўринларни банд этган.