21 авг 10:15
Янгиликлар

Шахмат, Сув спорти турлари

Sinquefield Cup 2025. Нодирбек Абдусатторов ниҳоят илк очкосини қўлга киритди

АҚШнинг Сент-Льюис шаҳрида шахмат бўйича мукофот жамғармаси 350 000 АҚШ долларини ташкил этувчи нуфузли турнирнинг 3-тур учрашувлари ортда қолди.

Grand Chess Tour’нинг якуний классик босқичи 29 августга қадар давом этади ва айланма тизимда 9 турдан иборат бўлади. Ушбу босқич GCT очколари учун сўнгги имконият ҳисобланади. Кечадан дунёнинг кўзга кўринган ва рейтинги юқори бўлган 10 нафар гроссмейстери бош соврин учун баҳс олиб бормоқда.

Ниҳоят, кетма-кет икки мағлубиятдан кейин Нодирбек Абдусатторов (2771) илк очкосини қўлга киритди. Биринчи турда америкалик Левон Аронян, 2-турда амалдаги жаҳон чемпиони Гукеш Доммараджуга ютқазган ҳамюртимиз азалий рақибларидан яна бири ҳиндистонлик гроссмейстер Рамешбабу Праггнанандҳа (2779) билан дурангга имзо чекди.

Таққослаш учун, Рамешбабу илк турда ватандоши Гукешни мағлубиятга учратиб, 2-турда Фабиано Каруана билан муросага келганди. Учинчи турда битта ғалабали партия қайд этилди. Унда Каруана франциялик Алиреза Фирузджани мағлуб этишнинг уддасидан чиқди. Қолган партияларда томонлар дурангга рози бўлишди.

Бугун Sinquefield Cup 2025 турнирида 4-тур учрашувлари ўтказилади. Бизнинг вақт билан соат 22:00да бошланадиган турда Нодирбек Абдусатторов оқ доналарда пешқадам Фабиано Каруанага қарши баҳс олиб боради. Турнир жадвалида 4-тур олдидан Фабиано 2 очко билан қўшимча кўрсаткичларга кўра карвонбошилик қилмоқда. Левон Аронян ва Рамешбабу Праггнанандҳа ҳисобида ҳам 2 очкодан бор. Ярим очкога эга Абдусатторов ҳозирча сўнгги 10-поғонадан жой олган.

Sinquefield Cup 2025. 3-тур натижалари:

Сэм Севиан (АҚШ) - Гукеш Доммараджу (Ҳиндистон) 1/2-1/2

Нодирбек Абдусатторов (Ўзбекистон) - Рамешбабу Праггнанадҳа (Ҳиндистон) 1/2-1/2

Фабиано Каруана (АҚШ) - Алиреза Фирузджа (Франция) 1-0

Максим Вашье-Лаграв (Франция) - Левон Аронян (АҚШ) 1/2-1/2

Ян-Криштоф Дуда (Польша) - Уэсли Со (АҚШ) 1/2-1/2