Sinquefield Cup. Нодирбек Абдусатторовда яна дуранг ва бошқа натижалар

Grand Chess Tour мусобақасининг бешинчи босқичи ҳисобланган ушбу турнирнинг мукофот жамғармаси 350 000 АҚШ долларини ташкил этади. Ғолиб шахматчи 100 000 долларга эга чиқади. Мусобақада дунёнинг 10 нафар кучли гроссмейстерлари бош соврин учун баҳсларга киришди. Улар орасида жаҳон чемпиони Нодирбек Абдусатторов (2762) ҳам бор. 

Турнирнинг 5-турида ҳамюртимиз оқ доналарда Доммараджу Гукеш (Ҳиндистон, 2766)га қарши баҳс олиб борди ва дурангга имзо чекди. Нодирбек 4 дуранг ва 1 мағлубиятга эга бўлиб турибди. У ҳали бу мусобақада ғалаба қозона олмади. 

Бешинчи турда ҳам аввалги турларда бўлгани сингари битта ғалаба қайд этилди. Мусобақада пешқадамлик қилаётган Алиреза Фирузжа (Франция, 2751) оқ доналарда ўйнаб, аутсайдер Аниш Гири (Нидерландия, 2746)ни таслим этди. Ушбу ғалабадан кейин Алиреза 3,5 очко билан якка пешқадам бўлиб олди. Америкалик Уэсли Со 3 очко билан 2-ўринни банд этган. 

Бугун турнирда дам олиш куни сифатида эълон қилинган. Нодирбек Абдусатторов эртага ўтказиладиган 6-турда қора доналарда турнирда сўнгги ўринни эгаллаб турган Аниш Гири билан ҳисоб-китоб қилади. Гири ҳисобида 1,5, Нодирбекда эса 2 очко бор. Олтинчи тур олдидан олти нафар гроссмейстер 2,5 очкодан жамғарган. 

Турнир иштирокчилари: Фабиано Каруана (АҚШ, 2793), Ян Непомнящий (FIDE, 2767), Доммараджу Гукеш (Ҳиндистон, 2766), Нодирбек Абдусатторов  (Ўзбекистон, 2762), Уэсли Со (АҚШ, 2751), Алиреза Фирузжа (Франция, 2751), Рамешбабу Прагнанандха (Ҳиндистон, 2749), Аниш Гири (Нидерландия, 2746), Дин Лижэнь (Хитой, 2745), Максим Вашье-Лаграв (Франция, 2721).