Собиқ Bellator чемпиони Вадим Немковга жанг берилди

Россиялик аралаш яккакураш устаси шу ой жанг ўтказишга розилик берди. Бу ҳақда Немковнинг жамоасидагилар хабар беришди. 

"Вадимнинг жанги тасдиқланди. Шу кунларда рақиб эълон қилинади", - дейилади хабарда. 

Аслида у 25 январь куни БААнинг Дубай шаҳрида ташкил этиладиган Bellator Champions Series турнирида октагонга чиқиши керак. Унинг бу турнир кардида қолиш ёки бошқа сана ва манзилда жанг қилиши ҳозирча номаълум. Вадим аввалига собиқ PFL чемпиони Анте Делия билан жанг ўтказиши керак эди. Лекин Анте жангдан "ечилди". Кейин россияликнинг америкалик Кори Андерсонга қарши жанги белгиланди. Аммо бу сафар Немков бу жангдан бош тортди. 

Маълумот учун, ўтган йилнинг февраль ойида Вадим Немков оғир вазн тоифасида муваффақиятли дебют қилганди. Ўшанда у Ар-Риёдда ўтган PFL ва Bellator промоушенларининг қўшма турнирида собиқ PFL чемпиони Бруно Каппелоззани иккинчи раундда қўлдаги учбурчак усули орқали мағлуб этганди. Кейин октябрь ойида 32 ёшли Вадим PFL суперчемпионлиги учун кечган Фрэнсис Нганну ва Хенан Феррейр жанги учун захира варианти бўлди.