"Соғлом ҳаёт учун 5 минг қадам" – марафон Наманганда давом этмоқда

Ўзбекистон Республикаси Жисмоний тарбия ва спорт вазирининг 2020 йил 1 июндаги «Ўзбекистон Республикасига коронавируснинг кириб келиши ва тарқалишини олдини олиш юзасидан чора-тадбирлар дастурини тайёрлаш бўйича республика махсус комиссияси қарорига кўра ҳудудларда спорт машғулотларини ташкил этиш тўғрисида»ги 645-сонли буйруғига биноан, мамлакатимизнинг «яшил» ҳудудларида спорт секциялари, тўгараклари, спорт заллари ва фитнес-клублар фаолияти йўлга қўйилмоқда.

Қолаверса, спортчилар ҳам карантин талабларига риоя қилган ҳолда машғулотларни олиб бориши бўйича ҳам чора-тадбирлар ишлаб чиқилмоқда. Шунингдек, 8 июнь куни Жисмоний тарбия ва спорт вазири Дилмурод Набиев раҳбарлигида ўтказилган видеоселектор йиғилишида карантин талаблари босқичма-босқич юмшатиб борилаётгани сабабли эндиликда аҳолининг бўш вақтларини мазмунли ташкил этиш ва саломатликларини тиклашда устувор бўлган спорт машғулотлари жараёнига уларни кўпроқ жалб этиш масаласига алоҳида эътибор қаратилган эди.

Куни кеча Наманган вилояти жисмоний тарбия ва спорт бошқармаси, Чортоқ туман жисмоний тарбия ва спорт бўлими ташаббуси билан нуронийлар иштирокида «Саломатлик учун 5 минг қадам», «Соғлом ҳаёт учун 5 минг қадам» шиорлари остида пиёда юриш марафони ўтказилди.

Мазкур марафон Чортоқ туман болалар-ўсмирлар спорт мактаби марказий ўйингоҳида ташкил этилиб, барча марафон иштирокчилари карантин қоидаларига тўлиқ риоя қилган ҳолда ташкил этилди. бу каби ҳаракатлар инсон саломатлиги учун бўлган аҳамияти юзасидан аҳолига кенг маънода тушунтиришлар ҳам берилди.