Спорт курашлари: “Тошкент-2025” ўйинларида қатнашадиган ёшлар сараланди

Эркин ва юнон-рум кураши бўйича 2008-2009 йилларда туғилган ёшлар ўртасида Олимпия ва Паралимпия спорт турларига тайёрлаш марказлари тарбияланувчилари иштирокида ташкил этилган “Раҳбар кубоги” мусобақасида 264 нафар ёшлар қатнашди. Ўзига хос ёшлик шиддати уфуриб турган беллашувларни 20 нафар ҳакамлар гуруҳи бошқариб борди.  

Юнон-рум ва эркин кураш бўйича 10 тадан вазн тоифасидаги мусобақаларда ўз вазнларида Алибек Қўзиев, Шаҳбоз Ярашев, Улуғбек Рашидов, Элёрбек Тиллабоев, Аслбек Тўйев, Беҳруз Валиев, Ҳумоюн Эркинов сингари ёшлар ғолиблик шоҳсупасига кўтарилди. 

Медаллар жамғариш борасида эркин ва юнон-рум курашида умумжамоада Тошкент ёшлари 1-ўринни эгаллаган бўлса, эркин курашда совринли ўринлар Бухоро ва Навоий вилояти вакилларига, юнон-рум курашида Фарғона ва Чирчиқ шаҳри жамоаларига насиб этди.  

– Мусобақаларда 250 нафардан зиёд ёш спортчилар қатнашган бўлса, уларнинг 80 нафари совринли ўринларни эгаллади. Энг муҳими, спорт курашлари бўйича ўнлаб истеъдодлар кашф этилди. Айнан ушбу мусобақада маҳоратини намойиш этганлар орасидан келгусида “Тошкент-2025” Осиё ўйинларида ватанимиз шарафини ҳимоя қиладиган терма жамоалар шакллантирилади, – дейди Республика Олимпия ва Паралимпия спорт турларига тайёрлаш маркази директори Аброр Мамадалиев.  

Мусобақанинг ғолиб ва совриндорлари қимматбаҳо совғалар, медаль ва дипломлар билан тақдирланди.