Спорт курашларида онлайн мулоқот бўлиб ўтди

Унда мураббийлар, спортчилар ва ҳакамлар иштирок этишди. Эркин кураш бўйича Ўзбекистон терма жамоаси маслаҳатчи-мураббийи Али Аҳмедов курашчиларнинг машғулот олиб бориш жараёнлари ҳақида гапириб берди. Турли иқлим ва жой шароитларига машғулотлардаги ўзгаришларга алоҳида урғу қаратди. Машғулотларда кўпроқ нималарга эътибор қаратиш керак эканлигини тушунтирди. 

"Спорт курашларида энг муҳим жиҳат бу - куч! Куч эса жисмоний машғулотлар ёрдамида бунга эришилади. Кўпроқ штанга кўтариш керак. Лекин бу жараёнда оғирликка эътибор қаратиш лозим. Денгиз сатҳидан баландлик ҳам машғулотларда инобатга олиниши керак. Яъни юкламалар кўр-кўрона белгиланмаслиги лозим. Мослашувчанликни ривожлантириш учун биз маълум бир акробатик машқларни ўрганамиз: умбалоқ ошиш, колесо, рондат, турли кўринишдаги сальто, оёқларни тепага қаратган ҳолда қўлда юриш, мост ҳолатидан тик ҳолатга келиш. Эгилувчанлик сифати ихтиёрий ҳисобланади. Курашчи учун унчалик ҳам зарур ва мажбурий эмас. Аксарият машҳур полвонлар эгилувчанлик эмас, аксинча, мослашувчанлиги билан ажралиб туради. Улар бу камчиликни ўзларининг бошқа ривожланган сифатлари, масалан куч билан беркитишга ҳаракат қилишади ва бу иш беради. Айрим курашчилар айёрлик ҳам ишлатишади. Бу шундан далолат берадики, кураш фақат куч ва мослашувчанликдан иборат эмас. Бу худди шахмат доскасига ўхшайди. Партияда гроссмейстерлардан қисқа фурсатда ақл билан тез қарор қабул қилиш қобилиятига эга бўлиш талаб этилади. Қийин вазиятдан чиқиб кетиш ўша шахматчининг қандай куч ва маҳоратга эга эканидан далолат беради. Ҳар қандай ҳолатда ҳам пухта ишлаб чиқилган мослашувчанлик ҳам самара келтиради. Куч, эпчиллик, техника, ақл каби сифатлар курашчини ғалаба сари етаклайди. Бу сифатлар курашчининг тактик имкониятларини кенгайтиришга ҳам имкон беради", - деди терма жамоамиз мураббийи.  

Ушбу онлайн мулоқотни Ўзбекистон миллий олимпия қўмитаси президенти Рустам Шоабдураҳмонов кузатиб борди. Тадбирнинг иккинчи қисмида у мураббий ва спортчилар билан алоҳида суҳбатлашди. Қорақалпоғистон Республикаси, барча вилоят вакиллари билан ҳозирги вазият, мавжуд камчиликлар хусусида фикр алмашди. Рустам Шоабдураҳмонов карантин қоидаларига тўлиқ риоя қилишга, пандемик вазиятда ҳамма ўз саломатлигига эътибор қаратиб, эхтиёт бўлишга чақирди.