Спорт вазири Олимпия ва паралимпия шон шуҳрати музейида ёшлар билан учрашди

Учрашув давомида Спорт вазири ёшларнинг билим олиши, ўз иродаси, кучи ва имкониятларига бўлган ишончни мустаҳкамлаш, мардлик ва ватанпарварлик, она Ватанга садоқат туйғуларини камол топтириш борасида фикр-мулоҳазаларини билдириб, Давлатимиз раҳбари ташаббуси билан юртимизда спортни янада ривожлантириш борасида амалга оширилаётган кенг кўламли ишлар ҳақида батафсил маълумот берди.

Шу билан бирга мамлакатимиз спортчиларининг Олимпия ва Паралимпия ўйинлари, Жаҳон чемпионатлари, Осиё ўйинлари ҳамда халқаро мусобақаларда юксак натижаларга эришаётгани, дунёда Ўзбекистоннинг обрў-эътибори ва спорт салоҳияти янада ошаётгани, республикамиз ҳудудларида жаҳон андозаларига мос муҳташам спорт иншоотлари барпо этилаётгани, ўқувчи ва талаба ёшлар ўртасида “Беш ташаббус олимпиадаси”, "Янги Ўзбекистон олимпия чўққилари", “Универсиада” каби спорт мусобақаларининг мунтазам ўтказилиб келинаётгани ва бунинг натижасида спорт билан шуғулланаётган ёшлар сони йилдан-йилга ортиб бораётгани алоҳида таъкидланди. 

Хусусан, "Беш ташаббус олимпиадаси" доирасида фаол иштирок этиб, ўз иқтидорини намоён этган, бугунги кунда енгил атлетика спорти бўйича юқори натижаларга эришиб келаётган қашқадарёлик спортчи Жонбиби Ҳукмова ҳам вазир билан ўтказилган мулоқотда юртимиз ёшларига яратиб берилаётган шароитлар учун Давлатимиз раҳбарига миннатдорлик билдирди. 

Ёшлар билан самимий мулоқот руҳида бўлиб ўтган учрашув давомида вазир ёшлар томонидан берилган саволларга жавоб бериб, илгари сурилган таклифларни тинглади. Уларнинг спорт мусобақаларида янада фаол иштирок этишлари учун қўшимча шарт-шароитлар яратиш юзасидан мутасаддиларга тегишли топшириқлар берилди.

Тадбир якунида ўз фаолиги ва шижоати билан спорт соҳасида намуна бўлиб келаётган бир қатор ёшлар ташаккурнома ва эсдалик совғалари билан тақдирланди.