Султонов кучли рақибга қарши уч сетдан иборат учрашув ўтказди

Соврин жамғармаси 50 000 АҚШ долларини ташкил қилувчи ушбу турнирда ҳамюртларимиз - Денис Истомин ва Ҳумоюн Султонов ҳам иштирок этяпти. Мусобақанинг биринчи ракеткаси бўлган Истомин кеча илк даврада португалиялик Фредерику Сильвани 6:3, 7:5 ҳисобида мағлуб этганди. 

Ҳозиргина якунига етган учрашувда истеъдодли теннисчимиз Ҳумоюн Султонов мисрлик Муҳаммад Сафватга қарши баҳс олиб борди. Икки соату 32 дақиқа давом этган баҳс якунида тажрибали ҳисобланган Сафват 6:2, 4:6, 7:6, тай-брекда 7:4 ҳисобида ғалаба қозониб, иккинчи даврага йўл олди. 

Таққослаш учун, мисрлик теннисчи дунё рейтингида 196, Султонов эса 563-ўринни эгаллаб турибди. Ҳумоюннинг саралаш турнирида уч нафар рақибини мағлуб этиб асосий тўрга етиб келгани ҳам эътиборга молик ҳолат. Сафват билан учрашувда Султонов ҳисоб 4:5 рақиб фойдасига бўлиб турган бир вазиятда учта матчболдан ҳам чиқиб кетди.