Султонов Нью-Делида рейтингда ўзидан 548 поғона қуйидаги теннисчига ютқазди

Мукофот жамғармаси 25 минг долларни ташкил этувчи ушбу мусобақада ҳамюртимиз Ҳумоюн Султонов ҳам ўз имкониятини синаб кўрди. Афсуски, мамлакатимизнинг биринчи ракеткаси бироз аввал якунига етган илк давра учрашувида мағлубият аламини тотиб кўрди. 

Турнирда иккинчи рақам остида таснифланган Султонов 1/16 финал баҳсида ҳиндистонлик Маниш Сурешкумарга қарши кортга чиқди ва рақибига уч сет натижасига кўра имкониятни бой берди - 6/4, 5/7, 4/6. 

Таққослаш учун, Ҳумоюн ATP рейтингида 329, Маниш эса 877-поғонадан жой олган. Султонов 2 соату 29 дақиқа давом этган баҳс давомида 2, унинг рақиби эса 11 та эйс зарбасини амалга оширган. Қўшхатолар иккала теннисчида ҳам 6 тадан бўлди.