Superbet Chess Classic Romania. Нодирбек Абдусатторов илк ғалабасини қўлга киритди

Grand Chess Tour 2025 таснифига кирувчи — Superbet Chess Classic Romania турнирининг мукофот жамғармаси 350 000 АҚШ долларини ташкил қилади. Ғолиб умумий сумманинг 100 000 долларига эга бўлади. Дунёнинг кўзга кўринган гроссмейстерлари қаторида бош соврин учун Нодирбек Абдусатторов ҳам кураш олиб бормоқда. 

Гроссмейстеримиз кеча ўтказилган 7-тур учрашувида ниҳоят мусобақадаги биринчи ғалабасини қўлга киритди. У оқ доналарда польшалик халқаро гроссмейстер Ян-Криштоф Дудани мағлубиятга учратди. Нодирбек 8-тур олдидан 1 ғалаба, 5 дуранг ва 1 мағлубият билан 3,5 очко жамғарган ҳолда қўшимча кўрсаткичларга кўра 7-ўринга кўтарилиб олди. Бешинчи ўриндаги Левон Аронян ҳисобида ҳам 3,5 очко бор. 

Еттинчи турнинг қолган барча партияларида томонлар дурангга имзо чекишди. Тўрт нафар шахматчи 4 очкодан тўплаб, кучли тўртликдан жой олган. Қўшимча кўрсаткичларга кўра Фабиано Каруана пешқадам бўлиб турибди. Амалдаги жаҳон чемпиони, ҳиндистонлик Гукеш Доммараджу учун Руминиядаги турнир омадсиз ўтмоқда. У 2,5 очко билан сўнгги 10-ўринни банд этган. 

Бугун мусобақанинг 8-тур учрашувлари ўтказилади. Нодирбек Абдусатторов турнир жадвалида иккинчи ўринни эгаллаб турган франциялик Алиреза Фирузджага қарши қора доналарда ўйнайди.