SuperUnited Rapid & Blitz Croatia 2026. Нодирбек блицда ҳам, умумий рўйхатда ҳам 2-ўринга кўтарилди!

Grand Chess Tour’нинг учинчи босқичи ҳисобланган SuperUnited Rapid & Blitz Croatia 2026 турнирида ҳамюртимиз Нодирбек Абдусатторов ҳам иштирок этяпти. Мусобақа рапид ва блиц бўйича ўтказилаётган бўлиб, 10 нафар гроссмейстер бош соврин учун баҳс олиб бормоқда. 

Турнир иштирокчилари: Нодирбек Абдусатторов, Алирежа Фирузджа, Максим Вашье-Лаграв (иккиси ҳам Франция), Рамешбабу Праггнанандҳа, Гукеш Доммараджу (иккиси ҳам Ҳиндистон), Аниш Гири, Йорден Ван Форест (иккиси ҳам Нидерландия), Винсент Кеймер (Германия), Богдан-Даниель Дик (Руминия), Иван Сарич (Хорватия).

Мусобақа формати ва вақт назорати:

Рапид: 25 дақиқа + 10 сония (9 раунд)

Блиц: 5 дақиқа + 2 сония (18 раунд)

Турнирнинг рапид баҳсларида Нодирбек Абдусатторов 11 очко билан 3-ўринни банд этганди. Кечадан блиц, яъни тезкор шахмат бўйича 18 турдан иборат баҳслар бошланди. Биринчи кун 9 та тур учрашувлари ўтказилди. Гроссмейстеримиз амалдаги жаҳон тожи соҳиби ҳиндистонлик Гукеш Доммараджу, франциялик Максим Вашье-Лаграв, германиялик Винсент Кеймер, нидерландиялик Аниш Гири, руминиялик Богдан-Даниэль Дикни мағлубиятга учратди. Ҳиндистонлик Рамешбабу Прагнанандҳа ва пешқадам Алиреза Фирузджага қарши кечган баҳсларда имкониятни бой берди. Хорватиялик Иван Сарич ва нидерландиялик Йорден Ван Форест билан дуранг ўйнади. 

Абдусатторов блиц баҳсларида 6 очко билан турнир жадвалида 2-ўринни эгаллаб турибди. Алиреза Фирузджа 8 очко билан пешқадам бўлиб турибди. Агар кеча ўзаро ўйиндаги жуда яхши вазиятда ғалабани тантана қилганида Нодирбек Алирезанинг ўрнида карвонбоши бўларди. Учинчи поғонадан жой олган яна бир француз Максим Вашье-Лаграв ҳисобида ҳам 6 очко бор. 

Нодирбек рапид ва блиц баҳсларининг умумий рўйхатида ҳам иккинчи ўринга кўтарилиб олди. Унинг ҳисобида 17 очко бор. Максим Вашье-Лаграв 17 очко билан кучи учликка якун ясаган. Алиреза Фирузджа 20 очко билан умумий рўйхатда биринчи ўринни банд этган. Бугун блиц баҳсларида 9 тур партиялари ўйналади. Бугунги кунни Нодирбек оқ доналарда Гукеш Доммараджуга қарши учрашув билан бошланади.