Superunited Rapid & Blitz Croatia. Абдусатторов рапид бўйича учта партияда дона сурди

Мукофот жамғармаси 175 000 АҚШ долларини ташкил этувчи мусобақа рапид ва блиц йўналишларида ўтказилади. Унда Магнус Карлсен, Гукеш Доммараджу, Фабиано Каруана сингари шахмат юлдузлари қаторида ҳамюртимиз Нодирбек Абдусатторов ҳам совринли ўринлар учун дона сурмоқда.    

Мусобақа айланма форматда ўтказиляпти. Рапид баҳслари 9, блиц учашувлари эса 18 партиядан иборат бўлади. Кеча мусобақанинг илк куни рапид баҳслари доирасида 3 та тур партиялари ўтказилди. Нодирбек Абдусатторов 1-турда қора доналарда нидерландиялик Аниш Гирига имкониятни бой бериб қўйди. Иккинчи турда ҳиндистонлик Рамешбабу Праггнанандҳа, учинчи турда эса мезбонлар вакили Иван Сарич билан дурангга имзо чекди. 

Турнирда ғалабага 2, дурангга 1 очко берилади. Гроссмейстеримиз 6 имкониятдан 2 очко тўплаб, қўшимча кўрсаткичларга кўра 8-ўринни эгаллаб турибди. Тўрт очкога эга Магнус Карлсен қўшимча коэфицентларга кўра пешқадамлик қилмоқда.   

Мусобақа иштирокчилари: Нодирбек Абдусатторов (Ўзбекистон), Магнус Карлсен (Норвегия), Фабиано Каруана, Уэсли Со (иккиси ҳам АҚШ), Гукеш Доммараджу, Рамешбабу Праггнанандҳа (иккиси ҳам Ҳиндистон), Аниш Гири (Нидерландия), Ян-Криштоф Дуда (Польша), Алиреза Фирузджа (Франция), Иван Сарич (Хорватия)