Superunited Rapid & Blitz Croatia. Абдусатторовни ишлари чатоқ, Гукеш сўнгги 5 та учрашувда ғалаба қозонди

Мукофот жамғармаси 175 000 АҚШ долларини ташкил этувчи мусобақа рапид ва блиц йўналишларида ўтказиляпти. Унда Магнус Карлсен, Гукеш Доммараджу, Фабиано Каруана сингари шахмат юлдузлари қаторида ҳамюртимиз Нодирбек Абдусатторов ҳам совринли ўринлар учун дона сурмоқда.    

Мусобақа айланма форматда ўтказиляпти. Рапид баҳслари 9, блиц учашувлари эса 18 партиядан иборат бўлади. Кеча мусобақанинг иккинчи куни рапид баҳслари доирасида яна 3 та тур партиялари ўтказилди. Нодирбек Абдусатторов 4-турда оқ доналарда ўйнаганига қарамай, амалдаги жаҳон чемпиони Гукеш Доммараджуга имкониятни бой бериб қўйди. Ҳиндистонлик шахматчи ҳозиргача ўтказилган 6 та партиянинг 5 тасида ғалаба қозонди. Ҳатто Магнус Карлсен ҳам мағлуб этилди. 

Абдусатторов бешинчи турда америкалик Уэсли Со билан дуранг ўйнади. Олтинчи турда яна бир АҚШ вакили, рейтингда ўзидан юқорида бораётган Фабиано Каруанага ҳам оқ доналарда ўйнаб, ютқазиб қўйди. 

Турнирда ғалабага 2, дурангга 1 очко берилади. Гроссмейстеримиз 12 имкониятдан бор йўғи 3 очко тўплаб, турнир жадвалида сўнгги 10-ўринни эгаллаб турибди. Тўққизинчи поғонадаги Алиреза Фирузджа ҳисобида 4 очко бор. Гукеш 10 очко билан якка пешқадам, иккинчи ўриндаги польшалик Ян-Криштофф Дуда ҳисобида 8 очко бор. Уэсли Со 7 очко билан кучли учликка якун ясаган.