Superunited Rapid & Blitz Croatia. Гукеш чемпион бўлган рапид баҳсларида Абдусатторов нечанчи ўринни эгаллади?

Мукофот жамғармаси 175 000 АҚШ долларини ташкил этувчи мусобақа рапид ва блиц йўналишларида ўтказиляпти. Унда Магнус Карлсен, Гукеш Доммараджу, Фабиано Каруана сингари шахмат юлдузлари қаторида ҳамюртимиз Нодирбек Абдусатторов ҳам совринли ўринлар учун дона сурмоқда.    

Уч кунлик баҳслардан сўнг мусобақанинг рапид йўналишида ғолиб ва совриндорлар аниқланди. Тўққиз тур натижасига кўра, амалдаги жаҳон чемпиони Гукеш Доммараджу 14 очко билан биринчи ўринни эгаллади. Иккинчи ўрин 11 очко жамғарган польшалик Ян-Криштофф Дудага насиб қилган бўлса, норвегиялик афсона Магнус Карлсен 10 очко билан кучли учликка якун ясаб берди. 

Мусобақанинг учинчи куни шахматчилар рапид баҳсларининг 3 та турида ўзаро беллашишди. Нодирбек Абдусатторов уччала партияда ҳам дуранг натижа қайд этди. Аввалига Ян-Криштофф Дуда, кейин Магнус Карлсен билан муросага келди. Сўнгги турда эса франциялик Алиреза Фирузджа билан дурангга имзо чекди.

Шу тариқа, Нодирбек Абдусатторов 18 имкониятдан 6 очкогина жамғариб, рапид баҳсларини 10 иштирокчи орасида сўнгги 10-ўринда якунлади. Турнирда ғалабага 2, дурангга 1 очко берилади. 

Бугундан мусобақада 18 турдан иборат блиц, яъни тезкор шахмат баҳслари бошланади.