Superunited Rapid & Blitz Croatia. Магнус чемпион бўлган турнирда Абдусатторов нечанчи ўринни эгаллади?

Мукофот жамғармаси 175 000 АҚШ долларини ташкил этувчи мусобақа рапид ва блиц йўналишларида ўтказилди. Унда Магнус Карлсен, Гукеш Доммараджу, Фабиано Каруана сингари шахмат юлдузлари қаторида ҳамюртимиз Нодирбек Абдусатторов ҳам совринли ўринлар учун дона сурди.    

Мусобақанинг сўнгги икки куни иштирокчилар блиц, яъни тезкор шахматда ўзаро ҳисоб-китоб қилишди. Нодирбек Абдусатторов 18 та партиянинг тенг ярми, яъни 9 тасида ғалаба қозонишга муваффақ бўлди. Бешта учрашувда дуранг ўйнаган бўлса, 4 тасида имкониятни бой берди. 

Сўнгги кун блиц баҳсларида Магнус Карлсен, амалдаги жаҳон чемпиони Гукеш Доммараджу, Иван Сарич, Рамешбабу Праггнанандҳа ва Аниш Гирини мағлуб этишнинг уддасидан чиқди. Бу билан Нодирбек блиц турнирида 12 очко билан қўшимча кўрсаткичларга кўра 3-ўринни эгаллади. Иккинчи ўриндаги Уэсли Со ҳисобида ҳам 12 очко бор. Магнус Карлсен 12,5 очко билан блиц турнири ғолиби бўлди.  

Шу тариқа, Нодирбек Абдусатторов рапид ва блиц турнири натижаларига кўра 18 очко билан 6-ўринни банд этди. Рапид баҳсларидаги омадсиз иштирок Абдусатторовга якунда қимматга тушди. Тўртинчи ҳамда бешинчи ўринлардаги Ян-Криштофф Дуда ва Алиреза Фирузджа ҳисобида 19 тадан очко бор. Агар блицнинг сўнгги турида Нодирбек Алирезани ютганида ҳозир ўринлар алмашиб турган бўларди. 

Кутилганидек, Магнус Карлсен 22,5 очко жамғариб, Superunited Rapid & Blitz Croatia чемпионига айланди. Уэсли Со 20 очко билан иккинчи ўриндан жой олган бўлса, Гукеш Доммараджу 19,5 очко билан кучли учликка якун ясаб берди.