Сурхондарёда биринчилардан бўлиб Халқаро дзюдо куни нишонланди + ФОТОГАЛЕРЕЯ

Дзюдо асосчиси Дзигоро Кано айнан шу санада дунёга келган. Ҳар йили шу санада Халқаро дзюдо федерациясига аъзо 5 қитъанинг 200 га яқин мамлакати, шу жумладан Ўзбекистонда ҳам ўзига хос дзюдо байрами кенг тантана қилинади. 

Шунингдек, ҳар йили Халқаро дзюдо федерацияси (IJF) томонидан бу кунга ўзига хос шиор ҳам танланади. Бу сафар IJF WELLBEING шиорини танлади. Бу ўзбек тилида "Фаровонлик" маъносини англатади.

Бугун бутун дунёда бўлгани каби юртимизда ҳам Халқаро дзюдо куни кенг нишонланади. Биринчилардан бўлиб ушбу дзюдо байрамини сурхондарёлик дзюдочилар тантана қилишди. Термиз шаҳрида ташкил этилган тадбирда анъанага кўра болаларга ширинликлар ва албатта байрам торти улашилди.

Шунингдек, шу куннинг ўзида "Surxon Judo" клуби ташаббуси билан Халқаро дзюдо кунига бағишланган кичик ёшдаги дзюдочилар учун мусобақа ҳам ўтказилди. Ғолиб ва совриндорларга медаль, диплом ва эсдалик совғалари топширилди.

Тақдирлаш маросимида спортчилик фаолиятида жаҳон чемпионатинин кумуш медали совриндори, кўплаб халқаро мусобақалар ғолиби, Олимпия ўйинлари иштирокчиси бўлган, ҳозирда Сурхондарё вилояти терма жамоаси мураббийи сифатида ишлаётган Шарофиддин Лутфуллаев ҳам иштирок этди.