Сув полоси. Ўзбекистон аёллар терма жамоаси Жаҳон кубоги йўлланмасига эга чиқди!

Мазкур турнирда Ўзбекистон эркаклар ва аёллар терма жамоалари ҳам иштирок этишди.

Қувонарлиси, Ўзбекистон аёллар терма жамоаси мусобақа якунида бронза медалини қўлга киритиш билан бирга, шу йилнинг 1-7 май кунлари Германиянинг Берлин шаҳрида ўтказиладиган Жаҳон кубогининг иккинчи дивизиони мусобақасига йўлланмани ҳам қўлга киритди.

Маълумот ўрнида, Ўзбекистон аёллар терма жамоаси бундай турдаги нуфузли мусобақага илк маротаба йўлланмани қўлга киритмоқда.

Вакилаларимиз турнирда Таиланд терма жамоасини 16:13, Сингапурни эса 11:10 ҳисобида мағлубиятга учратиб, бронза медалига эга чиқишди.

Аёллар ўртасидаги мусобақа якунларига кўра, Қозоғистон вакиллари биринчи, таиландликлар иккинчи, Ўзбекистон терма жамоаси эса учинчи ўринни банд этди.

Эркаклар ўртасидаги баҳсларда Ўзбекистон, Хитой, Сингапур, Эрон, Таиланд, Гонконг, Қозоғистон, Филиппин каби жами 8 та терма жамоа икки гуруҳга бўлинган ҳолда иштирок этди. Ўзбекистон терма жамоаси “А” гуруҳидан ўрин эгаллади.

Терма жамоамиз гуруҳ босқичи ўйинлари якунига кўра 5-8 ўринлар учун курашни давом эттирадиган бўлди. Плей-офф босқичининг дастлабки учрашувида Гонконг терма жамоасини 12:11 ҳисобида мағлубиятга учратган ватерполчиларимиз, 5-6 ўринлар учун Сингапур термаси билан баҳс юритадиган бўлишди.

Мазкур учрашув кутилганидек сўнгги дақиқаларга қадар муросасиз курашлар остида кечди ва унда мусобақа мезбонлари бир тўп фарқи билан 12:11 ҳисобида ғалаба қозондилар.

Шундай қилиб, эркаклар ўртасида бўлиб ўтган мусобақада Ўзбекистон терма жамоаси кучли олтиликдан ўрин эгаллади. Мазкур мусобақада Хитой термаси олтин, Эрон вакиллари кумуш, қозоғистонлик ватерполчилар эса бронза медалига сазовор бўлишди.