Тарихий натижа - Жавоҳир Синдаров "Номзодлар турнири" ғолиби сифатида Жаҳон тожи учун ўйнайди!

Ҳозиргина гроссмейстеримиз 13-турда қора доналарда ўйнаганига қарамай, нидерландиялик Аниш Гири билан дуранг қайд этди. Айнан Гири Синдаровнинг энг яқин таъқибчиси бўлиб, ўртадаги фарқ икки очкони ташкил этаётганди. Бугунги дурангдан кейин икки очколик фарқ сақланиб қолди ва эртага ўтказиладиган сўнгги 14-тур натижасидан қатъи назар, Жавоҳир Синдаров "Номзодлар турнири" чемпионига айланди. Жавоҳирнинг очколари 9,5, Гириники 7,5 тага етди. 

Маълумот учун, амалдаги Жаҳон Кубоги ғолиби бўлган Жавоҳир Синдаров Жаҳон тожи учун ўйнаш имкониятини берадиган турнирда иштирок этаётган биринчи ўзбек шахматчиси ҳисобланади. Ўн тўрт турдан иборат мазкур турнир ғолиби жаҳон тожи учун ҳиндистонлик Гукеш Доммаражуга қарши дона суриш ҳуқуқини қўлга киритарди. Мусобақани мағлубиятсиз якунлаётган Жавоҳир ана шу ягона йўлланма соҳибига айланди. 

Гукеш Доммаражуга қарши Жаҳон тожи учун матч шу йилнинг ноябрь охири ёки декабрь ойи бошида бўлиб ўтади. Ҳозирча матч манзили аниқ эмас.