Tata Steel Chess-2025. Абдусатторов амалдаги жаҳон чемпиони билан ўйнади, у ҳамон пешқадам!

Бир кунлик дам олишдан сўнг мусобақада 6-тур учрашувлари ўтказилди. Нуфузли турнирнинг "Мастерс" гуруҳида Нодирбек Абдусатторов, "Челленжер"ида эса Нодирбек Якуббоев совринли ўринлар учун баҳс олиб боряпти.

Кеча 6-турда Нодирбек Абдусатторов (2768) бугунги кундаги асосий рақибларидан бири - амалдаги жаҳон чемпиони, ҳиндистонлик Гукеш Доммараджу (2777) билан оқ доналарда ҳисоб-китоб қилди. Етти соатга яқин давом этган муросасиз баҳсда дуранг натижа қайд этилди. Учрашувда Нодирбек яхшигина устунликка ҳам эришганди, аммо унинг ғалаба қозонишига Гукеш йўл қўймади. Ўзининг бир юришда йўл қўйган хатоси ҳам учрашувнинг дуранг билан якунланишига сабаб бўлди. 

Шунга қарамай, Абдусатторов мусобақада пешқадамлигини сақлаб қолди. Еттинчи тур олдидан Нодирбек ҳисобида 4,5, Гукешда 4 очко бор. Ҳиндистонлик Рамешбабу Пргананандҳа ҳисобида ҳам 4,5 очко бўлиб, у қўшимча кўрсаткичларга кўра иккинчи ўриндан жой олган. 

"Челленжер" гуруҳида қатнашаётган Нодирбек Якуббоев (2659) эса 6-турда оқ доналарда ҳаракат қилганига қарамай, германиялик Фредерик Свен (2664)ни таслим эта олмади. Учрашув дуранг билан якунига етди. Якуббоев 6 имкониятдан 3 очко жамғариб, мусобақа жадвалида 9-поғонани банд этган. Унинг рақиби Свен эса 3 очко билан қўшимча кўрсаткичлар бўйича 8-ўринни эгаллаган.