Tata Steel Chess 2026. Таъқибчисини мағлуб этган Абдусатторов якка пешқадам, Cиндаров соф иккинчи + ФОТО

Турнирнинг кучлилар жам бўлган "Мастерс" гуруҳида дунёнинг етакчи 14 гроссмейстери қаторида ҳамюртларимиз Нодирбек Абдусатторов ва Жавоҳир Синдаров ҳам бош соврин учун баҳс олиб боряпти. Кеча тунда ўтказилган 12-турдан сўнг Нодирбек 8 очко билан яна якка карвонбоши бўлиб олди. 

Абдусатторов оқ доналарда яқин таъқибчиларидан бири, германиялик Маттиас Блубаумни мағлубиятга учратишга муваффақ бўлди. Жавоҳир Синдаров эса оқ доналарда мусобақанинг амалдаги чемпиони ҳиндистонлик Рамешбабу Праггнанандҳа билан дурангга имзо чекди. Нидерландиялик Йорден ван Форест Ҳиндистоннинг биринчи рақамли шахматчиси Аржун Эргаиси билан муросага келди. 

Германиялик Винсент Кеймер чехиялик Тай Даи Ван Нгуэндан устун келди. Словениялик Владимир Федосеев туркиялик 14 ёшли гроссмейстер Ягиз Каан Эрдогмушга ютқазиб қўйди. Мезбонлар вакили Аниш Гири ҳинд шахматчиси Аравиндҳ Читамбарам билан дуранг қайд этди. Амалдаги жаҳон чемпиони Гукеш Доммараджу эса қора доналарда америкалик Ҳанс Ниеманн билан очколарни бўлишиб олди. 

Ўн иккинчи турдан сўнг Нодирбек Абдусатторов 8 очко билан якка пешқадам бўлиб олди. Жавоҳир Синдаров 7,5 очко билан соф иккинчи ўринни эгаллаб турибди. Йорден ван Форест, Ҳанс Ниеманн ва Винсент Кеймер ҳисобида 7 очкодан бор. Маттиас Блубаум ва Ягиз Каан 6,5 очко билан олтинчи ҳамда еттинчи поғоналарни банд этган. 

Tata Steel Chess 2026. 12-тур натижалари:

Винсент Кеймер (Германия) — Тай Даи Ван Нгуэн (Чехия) 1-0 

Аравиндҳ Читамбарам (Ҳиндистон) — Аниш Гири (Нидерландия) 0,5-0,5

Жавоҳир Синдаров (Ўзбекистон) — Рамешбабу Прагнанандҳа (Ҳиндистон) 0,5-0,5

Нодирбек Абдусатторов (Ўзбекистон) — Маттиас Блубаум (Германия) 1-0

Йорден ван Форест (Нидерландия) — Аржун Эригаиси (Ҳиндистон) 0,5-0,5

Ҳанс Ниеманн (АҚШ) — Гукеш Доммаражу (Ҳиндистон) 0,5-0,5

Ягиз Каан Эрдогмуш (Туркия) — Владимир Федосеев (Словения) 1-0

Бугун турнирда сўнгги 13-тур ўтказилади ҳамда чемпион ва совриндорлар маълум бўлади. Нодирбек Абдусатторов чемпионлик матчида қора доналарда Аржун Эригаисига қарши баҳс олиб боради. Жавоҳир Синдаров ҳам қора доналарда ўйнайди. У 3 очко билан мусобақа жадвалида сўнгги ўринни эгаллаб турган чехиялик Тай Даи Ван Нгуэн билан ҳисоб-китоб қилади. Учрашувлар бизнинг вақт билан соат 16:15да бошланади.