Тель-Авив Гран-Присидан сўнг дзюдочиларимизнинг рейтинглари кўтарилди

Табиийки, Исроилдаги турнир ўзбекистонлик дзюдочиларнинг рейтингда эгаллаб тургани ўринларига ҳам таъсир ўтказди. Бугунги кунда супероғир, яъни +100 кг вазн тоифасида Ўзбекистоннинг биринчи рақамли спортчиси бўлиб турган Бекмурод Олтибоев 8-ўринга кўтарилиб олди. Осиё ўйинларининг бронза медали совриндори бўлган Бекмурод рейтингда 3086 очкога эга бўлиб турибди. 

Яна бир ҳамюртимиз -66 кг вазн тоифасидаги Сардор Нуриллаев 1699 очко билан рейтингнинг 26-поғонасидан жой олди. Ҳар икки дзюдочимиз Исроил Гран-Присида бронза медали учун курашиш имкониятига эга бўла туриб, якунда бешинчи ўринни эгаллашган ҳамда 252 рейтинг очкосига эга чиқишганди. 

Маълумот учун, Токио-2020 Олимпиадасига тўғридан-тўғри йўлланмани рейтингнинг дастлабки 18 поғонасини банд этган дзюдочилар қўлга киритишади.