Тим Цзю жамоасини бутунлай ўзгартирди

Энди унинг жамоасини австралиялик учта вазн тоифасида собиқ жаҳон чемпиони Жефф Фенек ҳам маслаҳатчи, ҳам мураббий сифатида бошқаради. Унга Майк Алтамура ва Дарси Эллис менежер сифатида ёрдам беради.

"Мен бу 2.0 версияси деган кайфият билан қайтяпман, - деди Тим Цзю ижтимоий тармоқдаги саҳифасида. - Мағлубиятимдан кейин ўзгаришлар ҳамда бошқа режа кераклигини ҳис қилдим. Бу менинг янги бобим, бу менинг даврим. Бутунлай янги кайфият билан қайтяпман. Барчангиз тарихга гувоҳ бўлинг.

Эслатиб ўтамиз, Тим Цзю профессионал рингдаги илк мағлубиятини ўтган йилнинг март ойида Себастьян Фундорадан қабул қилиб олган эди. Октябрь ойида у қайтишга уриниб кўрди, аммо IBF чемпиони Баҳром Муртазалиевга нокаут билан ютқазди. Шу йилнинг июль ойида эса реванш жангида яна Фундорага ютқазди. Орада апрель ойида Жозеф Спенсерни мағлубиятга учратди. 

Мағлубиятлардан кейин Цзю бутун жамоаси - менежер Глен Женнингс, мураббий Игор Голубев, жисмоний тайёргарлик бўйича мураббий Дейв Баркер, катман Марк Гембин ва шифокор Билл Энселайн билан хайрлашишга қарор қилди.

"Менга қилган ишлари учун йигитлардан жуда миннатдорман. Айниқса, мураббийим Игорга раҳмат. У профессионал фаолиятимни бошлашдан олдин мен билан ишлай бошлаган. Мен шунчаки ўзгаришларни хоҳладим ва бунга асосим борлигини ҳис қилдим", - деди Тим.

Уч вазн тоифасида собиқ жаҳон чемпиони, Халқаро бокс шон-шуҳрат зали аъзоси 61 ёшли Жефф Фенек узоқ вақтдан бери Тимнинг жамоасини боксчининг мағлубиятлари учун танқид қилиб келган ва бир ҳафта давомида барчасини тузатиши мумкинлигини очиқ айтган.

"Улар ҳамма нарсани нотўғри қилишди, - деди Фенек Fox Sports Australia нашрига берган интервьюсида. - Агар мен Себастьян Фундорага қарши 10 та жангда Тим Цзюнинг бурчагида бўлганимда, у ўнтасида ҳам ғалаба қозонган бўларди. Тимда тўғри жамоа бўлганида, у ҳали ҳам чемпион бўларди. Умид қиламанки, ҳали ҳам кеч эмас. Менимча, Тим Цзю каби боксчи ўз номи билан тўққиз ойдан кейин бемалол Топга қайтиши мумкин".