11 май 10:28
Янгиликлар

Теннис

Тимофеева фаолиятидаги илк чемпионлик турниридан қанча мукофот пули ва рейтинг очкоси ишлаб олди?

Кеча Ўзбекистоннинг учинчи ракеткаси Мария Тимофеева Туркиянинг Истанбул шаҳрида якунига етган WTA 125 тоифасига кирувчи турнир бош совринини қўлга киритганди.

Вакиламиз ҳал қилувчи финал учрашувида мусобақанинг биринчи ракеткаси, WTA рейтингда 89-ўринни эгаллаб турган хорватиялик 29 ёшли Донна Векични ортиқча қийинчиликсиз 6/4, 6/2 ҳисобида мағлубиятга учратган эди.

Бу ҳозирда дунёнинг 136-ракеткаси бўлиб турган 22 ёшли Тимофеева учун фаолиятидаги биринчи WTA даражасидаги чемпионлик соврини бўлди. Мария бир ҳафталик меҳнатидан 125 рейтинг очкоси ҳамда 15 500 АҚШ доллари миқдоридаги мукофот пулига эга чиқди. Ўз вақтида дунёнинг 17-ракеткаси бўлган Донна Векич эса 81 очко ҳамда 8 400 долларни қўлга киритди.