Тимур Кападзе: "Ҳали шартномам янгиланмади"

"Ўйлайманки, CAFA - яхши турнир бўлади. Икки йил аввал ҳам юртимизда ўтказилган эди. Бу сафар эса Ўмон ва Малайзия терма жамоалари мусобақага қўшилишди. Тайёргарлик учун яхши имконият бўлади. Янги футболчиларни синаб олиш имкониятимиз бўлади. Мусобақа зич тақвимга эга ва ФИФА кунларидан олдинроқ бошланади. Легионерлар биринчи учрашувга етиб келиши бироз қийинчилик туғдириши мумкин. Тайёргарлик кўриш учун ҳали вақтимиз бор. Ҳозир ўйинларни кузатиб боряпман, ким қандай ўйнамоқда ва кимни терма жамоага чақириш мумкин. Асосийси футболчиларимиз жароҳатларсиз бўлиши" - дея фикр билдирди Тимур Кападзе бўлажак мусобақа ҳақида.

- Янги футболчиларни синаб кўриш учун яхши имконият бўлади дедингиз. МТЖ қишда Дохада ўтказган йиғини каби CAFA мусобақасига фақатгина Суперлигада тўп тепаётган футболчилар жалб этилиши мумкинми?

- Ўзини кўрсатган футболчилар албатта жалб этилади. Мусобақа яқинлашиб қолган вақтда барчаси аниқ бўлиб қолади. Бунга қадар терма жамоага жалб этилмаган футболчиларни чақиришимиз мумкин бўлади. Янги футболчиларни синаб кўриш, улар терма жамоада қандай ўйин намойиш этишини билиб оламиз.

- Қатарга қарши ўйиндан сўнг шартномам ноябрь ойига қадар мўлжалланган деган эдингиз. Янги шартнома ҳақида ЎФА билан музокара олиб бормадингизми? Балки шартномани узайтириб бўлгандирсиз?

- Йўқ, ҳали шартномам янгиланмади. Менимча, бутун штабнинг шартномаси ноябрга қадар амал қилади. Ҳали вақтимиз бор, шошилмаяпмиз. Бу чуқур деталларга бой масала бўлгани сабабли, улар ҳам шошилмаяпти. 

Абдулвосит Бектемиров суҳбатлашди