Токио Олимпиадасида қатнашган 7 нафар Миллий гвардия спортчилари тақдирланишди

Тадбирда Тошкент шаҳар ҳокимлиги, Миллий Олимпия қўмитаси, Ўзбекистон қўл жанги федерацияси ҳамда Миллий гвардия таркибий ва ҳудудий бўлинмалари мутасаддилари, Токио олимпиадасида иштирок этган 7 нафар спортчи-ҳарбий хизматчилар, уларнинг ота-оналари ва мураббийлари иштирок этди.

Миллий гвардия қўмондони кириш сўзида давлатимиз раҳбарининг олимпиада ўйинлари иштирокчиларини тақдирлаш маросимида "Албатта, жаҳоннинг энг йирик спорт мусобақаси бўлмиш Олимпия ўйинларида иштирок этишнинг ўзи катта шараф ва масъулият. Буни барчамиз яхши тушунамиз. Бунинг учун қанча оғир довонлардан, машаққатли синовлардан ўтиш талаб этилади”, деган сўзларини ёдга олди.

Шунингдек, Миллий гвардия тизимидан мазкур мусобақаларда иштирок этган етти нафар мустақиллик йилларида туғилиб вояга етган боксчи ҳамда юнон-рум курашчилари, ўз иқтидори, салоҳияти билан миллионлаб қалбларни забт этгани ҳамда бокс бўйича энг оғир вазнда иштирок этган ҳарбий хизматчи Баходир Жалолов дунёнинг номдор спортчилари билан беллашиб, олимпиаданинг олтин медалини қўлга киритган ҳолда Ўзбекистон байроғини баланд кўтарилишига ва мадҳиямиз янграшига муносиб ҳисса қўшгани алоҳида таъкидлаб ўтилди.

Шундан сўнг Миллий гвардия қўмондонининг Олимпиада иштирокчилари ва уларнинг мураббийларини рағбатлантириш тўғрисидаги буйруғи ўқиб эшиттирилди. Унга кўра Олимпиадада иштирок этган етти нафар ҳарбий хизматчиларга Ўзбекистон Республикаси Миллий гвардияси шаънини муносиб ҳимоя қилиб ҳарбий хизматчи ва ходимлар орасида шахсий намуна кўрсатганликлари ҳамда Олимпия спорт турларини оммалашишига қўшган ҳиссалари учун Алвон берет кийиш ҳуқуқи берилди.

Шунингдек, лейтенант Баҳодир Жалолов Ўзбекистон Республикаси Миллий гвардиясининг бибринчи даражали “Намунали хизматлари учун” кўкрак нишони ва қимматбаҳо совға билан;

Лейтенант Рахимова Турсуной, лейтенант Қодирова Райҳона ва лейтенант Батуров Бобо-Усмонлар Ўзбекистон Республикаси Миллий гвардиясининг иккинчи даражали “Намунали хизматлари учун” кўкрак нишони ва қимматбахо совғалар билан;

Катта лейтенант Элмурат Тасмуратов, Оддий аскарлар Жалғас Бердимуродов ва Элнур Абдураимовлар Ўзбекистон Республикаси Миллий гвардиясининг ИИИ даражали “Намунали хизматлари учун” кўкрак нишони ва қимматбаҳо совғалар билан тақдирландилар.

Шу билан бирга ушбу спортчиларнинг Олимпия ўйинларида иштирок этиши учун ўзларининг муносиб ҳиссасини қўшган, бокс бўйича Ўзбекистон Миллий терма жамоаси катта мураббийи Тўлқин Қиличев ва бокс бўйича мураббий, Миллий гвардия ихтисослаштирилган ўқув маркази катта ўқитувчиси маёр Элшод Расулов, Спорт курашлари бўйича ихтисослаштирилган Олимпия захиралари мактаби мураббийси Равшан Рўзиқулов Ўзбекистон Республикаси Миллий гвардиясининг ИИИ даражали “Намунали хизматлари учун” кўкрак нишони билан тақдирланди.

Тадбир якунида сўз олганлар томонидан ҳалқимиз учун юксак ғурур бахш этиб, Янги Ўзбекистонимизга янги ғалабаларни туҳфа этган спортчиларимизга самимий тилаклар ва Париж–2024 ёзги Олимпия ўйинларида ўзларининг зафарли юришларини давом эттириб, Ватанимиз шарафини муносиб ҳимоя қилишларига ишонч билдирди.