Тўрабек Хабибуллаев: "Бундай мусобақаларда ҳеч ким ютқазаман деб рингга чиқмайди"

– Жаҳон чемпионатидаги энг оғир жанг қайси бўлди?

– Жаҳон чемпионатида ҳар бир рақиб кучли. Бундай мусобақаларда ҳеч ким ютқазаман деб рингга чиқмайди. Ҳамма бор кучи билан жанг қилади. Ливерпулда ярим финал ва финал жанглари аввалгиларига нисбатан қийинроқ бўлди. Мураббийларим томонидан берилган тўғри кўрсатма мени олтин медал сари етаклади.

– Париж-2024 Олимпиадасидан кейин бирдан катта вазнга ўтилди. Бу вазн йиғишда қийинчилик туғдирмадими?

– Аввал мусобақалардан олдин катта миқдорда вазн ташлар эдим. Кейинчалик бу жараён қийинчилик туғдира бошлади. Олимпиададан кейин устозларим юқорироқ вазн тоифасига ўтишни маслаҳат беришди. Бу таклифни қабул қилдим. Айтганимдек, олдиндан табиий вазним юқорироқ бўлгани учун янги тоифада катта қийинчилик сезилмади.

– Лос-Анжелес-2028 Олимпиадасига тайёргарлик йўлида яна қандай жиҳатлар устида ишлашингиз керак деб ҳисоблайсиз?

– Асосийси, янада кучли бўлиб тайёрланишим керак. Иккинчи Олимпиадамдан фақат олтин медал билан қайтишни мақсад қилганман. Албатта, бунинг учун кўпроқ меҳнат қилиш ва тезлигим устида ишлашим керак бўлади.