Тошкент нуфузли халқаро турнирга мезбонлик қилади

Анжуманда федерация вакиллари, Божхона қўмитаси масъуллари, тегишли вазирлик ва идоралар ҳамда оммавий ахборот воситалари вакиллари иштирок этди. Унда Марказий Осиё енгил атлетика ассоциацияси бош котиби Алексей Кондрат 15 май куни бўлиб ўтадиган мазкур турнирга тайёргарликнинг бориши ҳақида журналистларга ахборот берди.

UNG Meeting мусобақасида мамлакатимизнинг етакчи спортчилари, шунингдек, хорижий мамлакатлардан, хусусан, Озарбайжон, Эфиопия, Грузия, Эрон, Исроил, Қозоғистон, Қирғиз Республикаси, Тожикистон, Украина, Туркия, Марокаш, Судан каби 13 та давлатдан таклиф этилган етакчи енгил атлетикачилар иштирок этади.

Мазкур турнирда иштирок этиш спортчиларга шу йил 13-21 сентябрь кунлари Япония пойтахти Токио шаҳрида бўлиб ўтадиган жаҳон чемпионатида иштирок этиш ҳамда муҳим очколарни жамғариш орқали жаҳон рейтингида ўз мавқеини ошириш имконини беради.

Мазкур турнир Ўзбекистон енгил атлетика федерацияси, Спорт вазирлиги, Божхона қўмитаси ҳамда Миллий олимпия қўмитаси томонидан ўзаро ҳамкорликда ўтказилмоқда.