Трилогия Бетербиевга керак эмас. Нима учун? Таҳлил қилиб кўрамиз

Энди нима қилиш керак? 

Октябрь ойида натижаси баҳсларга сабаб бўлган, Дмитрий Бивол устидан қозонилган ғалабадан сўнг, Артур Бетербиев реванш жангини ютқазди – бу галги натижага ҳеч ким шубҳа қилмади.

Бетербиев йўқотилган чемпионлик камарларини қайтариш учун дарҳол учинчи жангни ўтказиш ниятида эканини эълон қилди. У ҳатто Бивол билан қўл сиқишдан ҳам бош тортди ва бу орқали қарама-қаршилик ҳали яна давом этишига ишаора қилди.

Лекин унга ҳақиқатан ҳам учинчи жанг керакми?

Бетербиев Бивол сингари тайёргарлик кўришга улгурмайди. У аллақачон 40 ёшда.

Агар унинг Александр Усик ва 2008 йил Пекин Олимпиадасида хитойлик Жанг Сяопинга қарши ютқазган жанглари баҳсли бўлган бўлса, Биволга қарши мағлубияти борасида хеч қандай шубҳалар йўқ, у аниқ ютқазди. Ғолиб эълон қилинганида Бетербиевнинг юзидан ҳам мағлубиятни тан олганини кўриш мумкин эди.

Лекин Бетербиевнинг буюк боксчи эканлигини қайд этиб қўйиш керак: унинг ҳаваскор боксдаги фаолиятини ҳам ҳисобга олсак, ҳеч қачон катта фарқ билан мағлуб бўлмаган. Унинг ҳаваскор боксдаги мағлубиятлари ё жуда яқин, ёки баҳсли бўлган. У 20 йилдан ортиқ вақт давомида юқори савияда жангар ўтказиб келмоқда. Ҳозир эса 40 ёшда ва бу босқичда у секин-аста кучсизланаётгани табиий ҳол.

Биволни учинчи жангда мағлуб этиш учун Бетербиев ўйин тактикаси ва ёндашувини кескин ўзгартириши керак бўлади. Лекин у буни шу даражада сифатли бажара оладими? Йўқ, бу муаммолар жавоб жанги олдидан ҳам кўзга ташланган эди. Бетербиев Биволга қарши босим ўтказишдан бошқа тактикани қўлламади. Масалан, биринчи жангда у бешинчи раундда фаол ҳаракатга ўтган бўлса, жавоб жангида учинчи раунддаёқ кучли босимни бошлади. Лекин бу ҳам ғалаба учун етарли бўлмади.

Бивол жавоб жангида айнан биринчи жангда қилиш керак бўлган ўзгаришларни қилди – унинг бокс услубидаги янгиликлар яққол кўзга ташланди. Бетербиев эса бутун профессионал фаолияти давомида тежамкор босимли услубда жанг қилган, аммо ёши ўтиши билан унинг ҳужумлар оралиғи катталашди ва Бивол айнан шу жиҳатдан фойдаланди.

Ҳозир Бетербиевнинг катта ўзгаришлар қилишга вақти йўқ. Чунки у 40 ёшда. Шунингдек, 10 йилдан ортиқ вақт давомида ишлаган услубини кескин ўзгартириш ҳам мантиқсиз бўлади. Бетербиевнинг асосий муаммоси – у энди ҳаваскорлик давридек кучли ва тезкор зарбалар йўллай олмайди. Шунингдек, у рақибини бурчакқа қамаш учун етарли тезкор оёқ ҳаракатларига ҳам эга эмас – Бивол эса айнан шу нуқсондан унга қарши фойдаланди.

Учинчи жангнинг сценарийси ўзгармайди, ҳатто иккинчи жанг билан орасида ярим йил ёки бир йил ўтса ҳам. Бетербиев худди шундай босим ва агрессияга таянади, Бивол эса бунга тайёр бўлади. Агар ҳамма нарса олдиндан аниқ бўлса, нега яна учинчи жанг керак?

Энг муҳими – агар учинчи жангда ҳам мағлуб бўлса, Бетербиевда боксда қолишга мотивация қоладими?

Агар учинчи жанг бўлмаса, Бетербиев учун кейинги қадам қандай бўлиши керак?

40 ёшига қарамай, Бетербиев жуда яхши жисмоний ҳолатда ва шу боис у ҳали ҳам дунё боксида юқори даражали боксчилардан бўлиб қолаверади. Жавоб жангида мағлуб бўлса ҳам, у рейтингларда топ-3 ичида қолади, ҳатто айрим рейтингларда биринчи ўринда ҳам сақланиб қолиши мумкин. Аммо Биволдан учраладиган иккинчи мағлубият уни чемпионлик пойгасидан чиқариб ташлайди. Шу боис, ўз позициясини сақлаш ва яна бир чемпионлик жанги учун имкониятни қўлга киритиш муҳимроқдир.

Ҳа, Бетербиевнинг ёши ўтмоқда... Лекин бу фақат Биволга қарши жангларда кўзга ташланди. Сабаби Бивол уни тезликда мағлуб этди. Лекин бошқа талабгорлар ва топ-проспектларга қарши жангларда у ҳали ҳамон фаворит. Чунки у ҳали ҳам кучли нокаутчи ва улкан чидамкорликка эга – бу эса ҳар қандай рақиб учун катта муаммо. Шу сабабли, Бетербиев яна бир неча йил юқори савияда бокс қила олади.

Биволсиз Бетербиев учун бошқа вариант борми?

Агар Бивол билан учинчи жангдан воз кечилса, бошқа вариант – дивизиондаги бошқа талабгорларга қарши жанглардир. WBC президенти Маурисио Сулейман Бивол Давид Бенавидес билан жанг қилиши кераклиги ҳақида гапирганди. Бетербиев эса Давид Моррель, Альберт Рамирес ва Майкл Эйфертга қарши жанг қилиши мумкин. У ҳар қандай рақибга қарши фаворит бўлади, чунки Бивол – Бетербиев жуфтлиги билан қолган рақиблар ўртасида жуда катта тажриба ва маҳорат фарқи бор.

Ҳатто WBC ва WBA вақтинчалик чемпиони Давид Бенавидес ҳам Бетербиевга қарши жангда аутсайдер бўлади. Чунки у ҳаддан ташқари реклама қилинган, ортиқча баҳо берилган боксчи бўлиб, техник жиҳатдан имкониятлари чекланган. У ҳам Бетербиев каби босим орқали жанг қилади, лекин унинг зарбалари заифроқ ва чидамкорлиги бутун жангга етадиган даражада эмас. Бундай боксчилар Бетербиев учун қулай – у уларни осонликча мағлуб этади.

Балки тўғри йўл – вазн тоифасини ўзгартиришдир?

Бошқа бир вариант – биринчи оғир вазнга ўтиш. Ҳозир бу вазнда икки камар Хильберто Рамиресга тегишли, уни Бивол 2022 йилда осонликча мағлуб этган. Яна бир чемпион – 41 ёшли Баду Жек, у эса бир неча марта мағлубиятга учраган.

Бетербиев ҳаваскор боксда -91 кг вазнда муваффақиятли иштирок этган. Ҳозирги крузервейт эса аввалгидан анча заиф – бу ерда асосан ярим оғир вазнда чемпион бўла олмаган боксчилар жанг қилади. Шундай экан, ҳатто 40 ёшда ҳам Бетербиев бу вазнда чемпион бўлиш имкониятига эга.

sports.ru сайти асосида тайёрланди