Туркияда 1000 дан ортиқ футболчи қимор можароси сабабли четлатилди. Рўйхатда "Галатасарой" ва "Бешиктош" ўйинчилари ҳам бор

Турли дивизионларда тўп сураётган 1000 дан ортиқ футболчи қимор ўйинларига алоқадорлик айби билан мусобақалардан четлатилди. Улар орасидан 27 нафари Суперлига жамоаларида тўп суради.

Туркиянинг Milliyet нашри хабар беришича, четлатилганлар орасида "Галатасарой", "Бешиктош", "Трабзонспор", "Анталяспор" футболчилари бор. Четлатилганлар орасидан фақат биттаси легионер ҳисобланади.

Туркия футбол федерацияси ФИФА билан қўшимча трансфер ойнасини очиш бўйича музокаралар олиб бормоқда, чунки иккинчи ва учинчи дивизион жамоалари таркиб тўплашда қийинчиликка дуч келган. Ҳозирча бу дивизионлардаги мусобақалар вақтинча тўхтатилган.

Бундан аввал Туркияда 17 нафар ҳакам ва икки клуб президенти ҳибсга олинган, шунингдек, 149 нафар ҳакам қимор ўйинларида иштирок этгани учун четлатилган эди.