"У онасига ҳеч қандай ваъда бермаган". Забит Хабиб эмас, у UFC'га тугалланмаган ишини якунлаш учун қайтмоқда

Доғистон вакилининг UFC'даги фаолияти ажойиб тарзда ўтди. У ярим енгил вазннинг энг зўрларидан бири эди. Яна битта жангдан сўнг Забит камар учун октагонга кўтарилиши лозим эди, бироқ кетма-кет иккита жангдан бош тортди ва у UFC радаридан йўқолиб қолди. UFC узоқ вақт давомида юлдузини рейтингда ушлаб турди, бироқ сабрнинг ҳам охири бор эди - UFC Забитни рейтингдан четлатди. Россиялик эса ёзда умуман фаолиятини якунлаганини эълон қилди. Аммо куни кеча Забит яна фаолиятини тиклаётганига шама қилди.

Магомедшариповнинг ММАдаги фаолияти яхши ўтди дейиш мумкин. UFC'га ўтгунига қадар рекорди 12-1 эди. Забит UFC'да 6 та жангда иштирок этди ва барчасида ғалаба қозонди. У бошқа доғистонликлардан фарқли равишда жангда тўлиқ туриб ҳаракат қилишни ҳам биларди. У ҳеч қачон боксдан қочмаган. Унинг жангларидан барча "кайф" қиларди. Бироқ кутилмаганда, ҳеч қандай сабабсиз Забит фаолиятини якунлади.

Энди Забит қайтмоқда. Қайтишини биринчилардан бўлиб Хабиб Нурмагомедов маълум қилди.

"Биз у билан тез-тез гаплашиб турамиз. Орамизда яхши муносабат бор. У қайтадими-йўқ, буни билмадим. Лекин у менга ўхшаб ҳеч кимга ваъда бермаган. Агар унга яхши таклиф беришса, у қайтиши мумкин", - дея фикр билдирганди Хабиб.

Бу фикрлардан сўнг Забит ҳам "тилга кирди". У ижтимоий тармоқда қайсидир ҳужжатга қўл қўйганини маълум қилди. Агар у UFC'га қайтишни режа қилган бўлса, ҳозир айни вақти!

UFC'да охирги йилларда ярим енгил вазнда ҳеч қандай интрига йўқ. Алекс Волкановски истаган рақибини истаганича мағлуб этмоқда. Забит уч йилдан бери жанг қилмаган бўлса ҳам, у вазннинг исталган жангчисидан хавфлироқ. Забитга биттада чемпионлик жанги берилмаслиги мумкин, лекин у қайтса, яқин икки ёки учта жангдан сўнг камар учун октагонга кўтарилади.

Забит энди 31 ёшга кирди. UFC учун ҳам доғистонликни қайтиши анча фойдали. Уларга кучли жангчилар керак. Магомедшарипов ҳам иккинчи ҳаракатда чемпионлик камарига эга бўлиш имкониятидан фойдаланиши мумкин.