Уч дзюдочимиз қатнашган Париж "Катта Дубулға" турнирини нечанчи ўринда якунладик?

Мусобақанинг сўнгги куни ўрта ва оғир вазн тоифаларида ғолиб ҳамда совриндорлар аниқланди. Кечаги кун дастуридан биргина дзюдочимизнинг чиқиши ўрин олганди. +100 кг вазн тоифасида баҳсларга киришган Ўткирбек Тўрабоев илк даврада франциялик рақиби Амаду Мейтегани иппон баҳоси эвазига мағлубиятга учратди. Аммо чорак финалда тажрибали Тома Никифоровга имкониятни бой бериб қўйди. Ўн дақиқа давом этган ўтиш баҳсида эса омад япониялик дзюдочига кулиб боқди. 

Шу тариқа, уч нафар дзюдочи билан қатнашган Искандар Расулов мураббийлигидаги Ўзбекистон терма жамоаси 1 та олтин ва 1 та бронза медали билан 50 давлат орасида 7-ўринни эгаллади. Шаҳрам Аҳадов турнир олтин медали ҳамда жаҳон рейтинги учун қимматли 1000 очкога эга бўлди. Бронза медали соҳиби Баҳром Ботуров эса 500 рейтинг очкосини ўз ҳисобига ёзиб қўйди. 

Мусобақа якунларига кўра, медаллар жамғариш бўйича Франция терма жамоаси 3 та олтин, 3 та кумуш, 9 та бронза медали билан 1-ўринни эгаллади. Биринчи кунги баҳслардан кейин пешқадамликни қўлга олган Япония терма жамоаси 3 та олтин, 3 та кумуш, 5 та бронза медали билан 2-ўринни банд этди. 

Корея Республикаси 1 та олтин, 2 та кумуш медаль билан кучли учликка якун ясаб берди. БАА, Озарбайжон, Испания, Ўзбекистон, Португалия ва Канада терма жамоалари сафида ҳам бир нафардан мусобақа чемпион бўлди. Жами 17 давлат Париж "Катта Дубулға" турнирининг камида 1 та бронза медалини қўлга киритди.