UFC 296 турнирининг асосий кардини очиб берувчи жанг бекор қилинди

Эътиборлиси, оқшомга уч кун қолган бир пайтда турнирнинг асосий кардини очиб бериши кутилган Висенте Луке - Йена Мачадо Гэрри жанги бекор қилинди. Бунга мағлубият нималигини билмай келаётган ирландиялик Йен Мачадо Гэррининг бетоб бўлиб қолиши сабаб бўлди. 

Бу хабарни шахсан UFC президенти Дана Уайт ҳам тасдиқлади.

"Ҳа, Йен Гэрри ва Висенте Луке жанги ўтказилмаслиги ҳақидаги хабарларни эшитдим ва бу айни ҳақиқат", - деди ташкилот раҳбари. "Гэрри тумов бўлиб қолди ва бу пневмонияга айланиб кетди. Шу боисдан бу жанг бекор қилинди. Жанг ўтказилмайди. 

Ўз ўрнида ирландиялик ҳозирги ҳолатида ҳам октагонга чиқмоқчи бўлганлиги, лекин шифокорлар бунга рухсат беришмаганини таъкидлади. 

"Мен пневмонияга чалиндим, шифокорлар қўлдан келганича ёрдам беришди. Лекин UFC шифокорлари жанг қилишим учун бир фоиз ҳам имкониятим йўқлигини айтишганидан кейин таслим бўлдим", - деди Йен.

Эслатиб ўтамиз, UFC 296 турнирининг асосий жангида ярим ўрта вазн тоифасида UFC чемпиони Леон Эдвардс даъвогар Колби Ковингтонга қарши октагонга кўтарилади.