UFC 314 турнирининг асосий жанги иштирокчилари юзма-юз келишди + ФОТО

Оқшомнинг асосий жанги ярименгил вазн тоифасида собиқ UFC чемпиони австралиялик Александр Волкановски ҳамда рейтингнинг учинчи поғонасида бораётган бразилиялик Диего Лопес ўртасида бўлиб ўтади. Жанг Илия Топурия вакант, яъни эгасиз қолдирган чемпионлик камари учун ўтказилади. 

Бугун тонг саҳарда UFC 314 турнири иштирокчилари иштирокида расмий матбуот анжумани ҳамда face to face маросими ташкил этилди. Волкановски ўтган йилнинг 18 февраль куни Анахаймда ўтган UFC 298 турнирида айнан Топурияга имкониятни бой берганди. "Матадор" иккинчи раундда Яшил қитъа вакилини нокаутга учратган эди. Бу Александр учун кетма-кет иккинчи мағлубият бўлганди. 

Диего Лопес эса бешта ғалабали серия билан келмоқда. У сўнгги жангини ўтган йилнинг 15 сентябрь куни Лас-Вегас шаҳридаги машҳур "Сфера"да ташкил этилган UFC 306 турнири доирасида америкалик Брайан Ортегага қарши ўтказиб, очколар ҳисобига кўра ғалаба қозонганди.