UFC 331 турнирининг санаси, манзили, асосий жанги очиқланди

Дунёнинг энг кучли лигаси 19 сентябрь куни Инглвуддаги "Intuit Dome" аренасида бўлиб ўтадиган UFC 331 турнири билан Лос-Анжелесга қайтади. Оқшомнинг жанглари ҳақида маълумот йўқ, аммо тахминларга кўра, унинг асосий воқеаси дивизионнинг амалдаги чемпиони австралиялик Александр Волкановски ва биринчи рақамли даъвогар россиялик Мовсар Евлоев ўртасидаги ярим енгил вазн тоифасидаги чемпионлик жанги бўлиши мумкин.

Шунингдек, ушбу тадбирда россиялик енгил вазн тоифасидаги етакчи Арман Царукян ҳам иштирок этиши мумкинлиги, унинг рақиби BMF чемпиони, бразилиялик Чарльз Оливейра бўлиши мумкинлиги айтилди.

Ўтган йилнинг январь ойида Ислам Махачев ушбу аренада енгил вазн тоифасида UFC чемпионлик камари ҳимоясини ўтказди ва биринчи раунддаёқ Ренато Мойканони бўғиб қўйганди. Бразилиялик аралаш яккакураш устаси қисқа фурсатда чемпионлик жангидан чиққан Арман Царукяннинг ўрнини эгаллаган эди.