UFC Fight Night 238. Марказий жанг сўнгги раунд олдидан тўхтатилди

Оқшомнинг марказий жанги оғир вазн тоифасида ўтказилиб, унда суринамлик нокаутчи Жаирзиньо Розенстрайк асли доғистонлик, ҳозирда Баҳрайн давлати шарафини ҳимоя қилаётган Шамиль Газиевга қарши октагонга чиқди. Беш раундга мўлжалланган жанг муддатидан аввал якунига етди. 

Уч раунд деярли тенг курашлар остида кечди. Тўртинчи раундга келиб, ташаббус тўлиқ Жаирзиньо томонига ўтди ва мухлислар бир томонлама жанг кўришди. Сўнгги бешинчи раунд бошланиши олдидан Шамиль Газиев секундантларига жангни давом эттира олмаслигини маълум қилди. Бунга унинг бир кўзи кўрмай қолгани сабаб бўлган. Рефери Марк Годдард ҳам вазиятдан келиб чиқиб, жангни тўхтатди. 

Жаирзиньо Розенстрайк техник нокаут эвазига ғалаба қозонди. Бундан аввалги жангида Жаилтон Алмейдага муддатидан аввал ютқазиб қўйган Розенстрайк октагонга ёздаёқ қайтишга ва Топ оғир вазнли аралаш яккакураш устаси билан жанг қилишга тайёрлигини маълум қилди.