UFC ўз ходимларини Бразилияда спиртли ичимликлар истеъмол қилмасликка чақирди

Маълумки, 12 октябрь тонгида Рио шаҳрида навбатдаги UFC турнири бўлиб ўтади ва оқшомнинг асосий жангида бразилиялик собиқ чемпион Чарльз Оливейра польшалик Матеуш Гамротга қарши октагонга чиқади. 

Маълумотларга кўра, Бразилияда кетма-кет одамларнинг заҳарланиши ортидан ходимларга огоҳлантириш ички хизмат хатида берилган.

"Бразилияда таркибида метанол бўлган спиртли ичимликларни истеъмол қилиш ҳолатлари кўпайди. Мамлакат соғлиқни сақлаш вазири Александр Падиля фуқароларга спиртли ичимликларни, айниқса, таркибида аралашмалар борлигини аниқлаш қийин бўлган дистилланган ичимликларни истеъмол қилмасликни қатъий тавсия этди. Шунинг учун спиртли ичимлик истеъмол қилишни режалаштирган бўлсангиз, соғлом фикр юритишни қатъий тавсия этамиз", - дейилади хизмат хатида.

Заҳарланишлар асосан ароқ ва виски орқали содир бўлган. Бугунги кунга қадар мамлакат бўйлаб 200 та ҳолат тасдиқланган, улардан камида учтаси ўлим билан якунланган. Заҳарланишлар қасддан қилинганми ёки ишлаб чиқаришдаги бахтсиз ҳодиса натижасими, ҳозирча аниқ эмас.