UFC раҳбарияти Муҳаммад Мокаев билан учрашув белгилади

Келиб чиқиши доғистонлик бўлган Мокаев россиялик промоутер Камил Гажиев билан суҳбатда UFC раҳбарияти билан бўлиб ўтадиган учрашув ҳақида айтиб ўтди.

"Жанг куни Хантер Кэмпбелл ва Мик Мейнард менга омад тилашди ва жангдан кейин ғалаба билан табриклашди. Мен ҳозир Қатарга учяпман, у ерда 22 ноябрь куни UFC турнири бўлиб ўтади ва мен улар билан айнан ўша ерда учрашаман", - деди Мокаев.

Ўтган ёзда 25 ёшли Мокаев кетма-кет еттита жангда ғалаба қозонган бўлса-да, UFC’дан ҳайдалганди. Шундан сўнг у ММА’да яна учта жанг ўтказиб, барчасида зафар қучди. Томас Ассис, Жовинсент Со ва Жерард Бернс мағлуб этилди. Шунингдек, у профессионал карате бўйича Karate Combat баннери остидаги жангда Қозоғистон вакили Болат Заманбековни нокаутга учратиб, муддатидан аввал ғалаба қозонди.

22 ноябрь куни Қатар пойтахти Доҳа шаҳрида UFC Fight Night 265 турнири бўлиб ўтади. Оқшомнинг асосий воқеаси енгил вазн тоифасида россиялик Арман Царукян ва янги зеландиялик Ден Хукер ўртасидаги потенциал даъвогарлик жанги бўлади.