Уимблдон-2023 ғолибаси тўрт йилга дисквалификация қилинди

Маълум қилинишича, спортчи ўтган йилнинг декабрь ойи бошида мусобақадан ташқари ўтказилган допинг текшируви вақтида намуна топширмаган. Вондроушова бу қарорини стресс ҳолатида бўлгани ва ўз хавфсизлигидан хавотир олгани билан изоҳлаган.

Бироқ мустақил трибунал спортчининг ҳам, ундан намуна олишга уринган допинг-назорат ходимининг ҳам кўрсатмаларини ўрганиб чиққанидан сўнг, текширувдан бош тортиш учун етарли ва ишончли асослар бўлмаган деган хулосага келди.

Вондроушованинг дисквалификацияси 2030 йил 21 июнга қадар давом этади. Шу давр мобайнида унга мусобақаларда иштирок этиш, машғулот ўтказиш ҳамда ITF, WTA, ATP ва «Катта дубулға» турнирлари доирасидаги тадбирларга ташриф буюриш тақиқланади.

Маълумот учун, Маркета Вондроушова 2023 йилда Уимблдон турнирида ғолиб чиққан. Шунингдек, у 2019 йилги «Ролан Гаррос» мусобақаси финалчиси ҳамда Токио Олимпиадасининг яккалик баҳсларида кумуш медаль соҳиби ҳисобланади.