Элина Свитолина 0/6 ҳисобидан чиқиб кетди

Дунёнинг 22-ракеткаси Элина Свитолина илк даврада иродали ғалабага эришди. Украиналик теннис маликаси WTA рейтингида 34-поғонада бораётган чехиялик Маркета Вондроушовага биринчи сетни "сухой" ҳисобда ютқазган бўлса-да, якунда ғалабани ўз томонига оғдира олди - 0/6, 6/2, 7/5.

Свитолина бу ғалабаси эвазига теннисчиларнинг ўзаро учрашувлари ҳисобида ҳам олдинга чиқиб олишга муваффақ бўлди - 4:3. Бир соату 55 дақиқа давом этган баҳсда Свитолина 1, Вондроушова 6 та эйс зарбасини амалга оширди. Қўшхатолар Элинада биттага кўпроқ бўлди - 5 га 4. Иккала теннисчи ҳам 5 тадан брейк-пойнтдан унумли фойдаланишди. 

Энди Свитолина иккинчи даврада америкалик Жессика Пегулага қарши кортга чиқади. Биринчи давранинг яна бир қизиқарли учрашувида тунислик Онс Жабер америкалик Маккартни Кесслердан 6/2, 6/0 устун келган бўлса, украиналик Даяна Ястремская АҚШ вакиласи Пейтон Стирнсга кутилмаганда ютқазиб қўйди - 5/7, 3/6.