Уимблдон. Карлос Алькарас чемпионлик ҳимоясини давом эттирмоқда

Дунёнинг иккинчи ракеткаси Карлос Алькарас мусобақанинг тўртинчи давра иштирокчисига айланди. Испаниялик теннисчи учинчи босқичда ATP рейтингида 125-поғонада бораётган германиялик Ян-Леннард Штруффни тўрт сет натижасига кўра мағлубиятга учратди - 6/1, 3/6, 6/3, 6/4.

Теннисчиларнинг ўзаро учрашувларидаги ҳисоб Карлос фойдасига йириклашди - 4:1. Икки соату 27 дақиқа давом этган баҳсда Алькарас 10, Штруфф 13 та эйс зарбасини амалга оширган. Қўшхатолар немис теннисчисида икки ярим баробар кўпроқ бўлди - 10 га 4. Брейклар бўйича устунлик эса табиийи, ғолиб теннисчи томонида бўлди - 5 га 2. Энди The Championships амалдаги чемпиони тўртинчи даврада россиялик Андрей Рублёвга қарши кортга чиқади.