Уимблдон турнирининг асосий тўр баҳсларига қуръа ташланди

Лондон шаҳрида теннис бўйича "Катта Дубулға" туркумига кирувчи, умумий мукофот жамғармаси 86 миллион долларни ташкил этувчи Уимблдон турнирининг саралаш баҳслари якунланиб, асосий тўрга йўлланма олган барча 128 теннисчи маълум бўлди.

Бироз аввал мусобақанинг асосий тўрига қуръа ташланди. Ўзбекистоннинг иккинчи ҳамда учинчи ракеткалари Мария Тимофеева ва Полина Кудерметова саралаш босқичида уч нафардан рақибаларини енгиб, асосий тўрга чиққан бўлса, биринчи рақамли теннисчимиз Камилла Раҳимова рейтингдаги ўрни бўйича тўғридан-тўғри асосий турнирда иштирок этади. 

Қуръа натижасига кўра, Камилла Раҳимова 1/64 финалда украиналик Ангелина Калининага қарши кортга чиқадиган бўлди. Раҳимова айни пайтда дунёнинг 65, Калинина эса 70-ракеткаси бўлиб турибди. Ушбу баҳс 29 июнь куни бизнинг вақт билан соат 15:00да бошланиши белгиланган. 

Иккинчи ракеткамиз Мария Тимофеева биринчи даврада бразилиялик Беатрис Хаддад Майяга қарши баҳс олиб боради. Мария WTA рейтингида 92, Беатрис 117-ўриндан жой олган. Ушбу учрашув ҳам 29 июнь куни соат 15:00да бошланади. 

Ҳозирда WTA рейтингида 116-поғонада бораётган мамлакатимизнинг учинчи ракеткаси Полина Кудерметова эса 1/64 финалда дунёнинг 42-ракеткаси, россиялик Людмила Самсонова билан ҳисоб-китоб қилади.