Умар Нурмагомедов собиқ UFC чемпионига "вызов" ташлади

У ўта енгил вазн тоифасида собиқ чемпион Дейвесон Фигередога қарши жанг қилиш истагини билдирди. Фигередо яқиндагина ўзи учун янги вазнда дебют қилганди. 

"Дейвесон Фигередо", - дея ўзининг ижтимоий тармоқдаги саҳифасида қисқа хабар қолдирган Умар. 

Ушбу пост остидаги изоҳларда мухлислардан бири Нурмагомедовдан UFC`да 6 та ғалабали серия билан келаётган Жонатан Мартинез билан жанг ўтказишни таклиф қилган. Умар бу таклифга ҳам қисқа ва лўнда жавоб берган: "Исталган вақтда"  

Декабрь ойи бошида Дейвесон Фигередо ҳакамларнинг якдил қарори билан Роб Фонтни мағлубиятга учратган эди. Бу ғалабадан кейин у ўзи учун янги рейтингда 8-ўринга кўтарилиб олганди. Жонатан Мартинез эса октябрь ойида дивизоннинг 12-поғонасида бораётган Эдриан Янизни нокаутга учратганди. 

Умар Нурмагомедов UFC октагонида 4 та жанг ўтказиб, барчасида зафар қучган. Сўнгги жангида бразилиялик Раони Барселосни биринчи раунднинг ўзида нокаутга учратган эди. Аслида россиялик август ойида америкалик Кори Сэндхагенга қарши жанг ўтказиши керак эди. Аммо Умарнинг жароҳати сабаб бу жанг бекор бўлганди. Катта эҳтимол билан Корига қарши жанг даъвогарлик мақомида бўлиши керак эди.