Умиджон Жалолов илк босқичдаёқ ютқазди. Қолган икки курашчимизда қандай натижа?

Бугундан эркин кураш мусобақасига ҳам старт берилди. Олимпиада лицензияси учун 3 нафар эркин курашчимизнинг баҳсларга киришиши ҳақида хабар берган эдик. Улар Бишкекдаги Осиё лицензион турнирида бу имкониятдан фойдалана олмаган эдилар. 

Афсуски, улардан Умиджон Жалолов илк босқичдаёқ мағлубият аламини тотиб кўрди. -65 кг вазн тоифасида юртимиз шарафини ҳимоя қилган Жалолов биринчи бўлимдан кейин 2-0 ҳисобида олдинда бораётганди. Иккинчи бўлимда эса ҳиндистонлик рақиби Сужитга аламли тарзда ютқазиб қўйди - 2:3. 

-97 кг вазнда курашаётган энг тажрибали курашчимиз, Рио-2016 Олимпиадаси бронза медали совриндори 39 ёшли Магомед Ибрагимов илк босқичда франциялик Адлан Висхановдан 11-0 ҳисобида устун келди. Унинг 1/8 финалдаги рақиби мўғулистонлик Ганҳуяг Ганбаатар бўлади. 

-125 кг вазндаги полвонимиз Ҳасанбой Раҳимов ҳам лицензион турнирни ғалаба билан бошлаб олди. У квалилифкация раундида албаниялик Парис Карепини 3-0 ҳисобида мағлубиятга учратди. Энди Раҳимов 1/8 финалда япониялик Таики Ямамотога қарши гиламга чиқади.