Умрининг қолган қисмини қамоқда ўтказиши мумкин бўлган собиқ UFC чемпионининг иши бўйича тафсилотлар

Сўнгги 12 соат ичида бир неча UFC жангчилари ижтимоий тармоқлар орқали собиқ чемпионни қўллаб-қувватлашларини билдиришди. Улар орасида Хабиб Нурмагомедов, Ислам Махачев, Исраэль Адесанья ва бошқа жангчиларни кўриш мумкин. Нима учун бутун дунё аралаш яккакурашлари усталари 39 ёшли фахрийни ҳимоя қилишмоқда?

2022 йил февраль ойининг охирида Веласкес қотилликка уриниш айби билан Санта-Клара (Калифорния) полицияси томонидан қўлга олинди. Куни кеча суд мажлиси бўлиб ўтди ва унда воқеа тафсилотлари маълум қилинди.

Санта-Клара прокурори офисининг ESPNга хабар қилишича, Кейнга 10 та айблов қўйилди: қотилликка уриниш, машинадаги одамларга ўқ узиш, қурол билан ҳужум қилгани учун учта айблов, ҳалокат даражаси юқори бўлган қурол билан ҳужум қилгани учун яна учта айблов, транспорт воситасига қуролдан атайлаб ўқ узиш ва жиноят содир этиш мақсадида ўқланган қурол олиб юриш.

Агар суд Веласкесни ўнта айбловнинг бештаси бўйича ҳам айбдор деб топса, собиқ чемпион 20 йил умрини қамоқда ўтказишига тўғри келади. Шу ўринда эслатиб ўтиш керак, Калифорния штатида ўлим жазоси мавжуд ва бу Кейнга ҳам хавф солиши мумкин. Кўриб турганингиздек, вазият жуда қалтис. Хўш, собиқ чемпионнинг бундай йўл тутишига нима сабаб бўлди?

Прокуратуранинг маълум қилишича, Веласкес ўз фарзандига нопок муносабатда бўлган 43 ёшли Гарри Гулартенинг автомобилига 40-калибрли қуролидан ўқ узган. Мiddleeasy ахборот манбаси хабарига кўра, яқин қариндош дейилаётган шахс бу - Кейннинг қизи эди. Веласкеснинг 13 ёшли қизи ва 4 ёшли ўғли бор. Chevy Silverado русумидаги автомобилда Гуларте билан бирга унинг ота-онаси ҳам бўлган. Веласкес автомобилга ўзининг Ford русумли пикапи билан зарба берган.

Отишма натижасида Веласкес нишонга олган Гуларте эмас, унинг отаси яраланган. Шифокорлар жароҳат 63 ёшли шахснинг ҳаётига жиддий хавф туғдирмаслигини таъкидлашмоқда. Шунингдек, полицияда Гуларте билан боғлиқ айбловлар ҳам бор эди. 23 февраль куни Гуларте Кейннинг фарзанди билан номақбул муносабатда бўлганликда гумон қилинди. Жабрланувчи сўроқ қилинди. Полициянинг айтишича, Гуларте Веласкеснинг фарзандига бир неча бор шундай муносабатда бўлган.

Шериф идорасининг хабар беришича, Гуларте вояга етмаган болага нисбатан бир неча марта тажовузда айбланиб, Санта-Клара округида қамоққа олинган. У 25 февраль куни Санта-Клара округи Олий судида айбдор деб топилди, аммо туман прокурорининг эътирозлари туфайли 50 000 $ гаров пули эвазига озод қилинди. Бу қарордан сўнг Веласкес адолатни ўз қўлига олишга киришди.

Туман прокурори биринчи суд мажлисидан кейин жуда вазмин ва эхтиёткор изоҳ берди:

"Фожиа шундаки, жаноб Веласкес адолатни ўз қўлига олишга қарор қилиб, жамоатчилик ва машинадагиларни хавф остига қўйди. Бу зўравонлик унинг оиласига янада кўпроқ азоб-уқубатларни келтириб чиқаради".

Оғир вазнда Bellatorнинг амалдаги чемпиони Райан Бейдер Веласкес ҳаётдаги энг ҳурматга сазовор инсон эканлигини айтди.

"Бу хабарни биринчи бор эшитганимда, бу ерда кўпроқ нарса бор деб ўйладим. Кейн билан узоқ вақтдан бери танишман ва у қўрқинчли кўринишига қарамасдан, сайёрамиздаги энг яхши, энг ғамхўр йигитлардан бири, у ҳақиқий оилапарвар. У ўзини бошқача тута оладими? Сиз қандай муносабатда бўлар эдингиз", - дея таъкидлаган Бейдер.

Энг асосийси, собиқ чемпионни америкалик ҳамкасблари ҳам ҳимоя қилмоқда: "Фарзандингизни зўрлаган одамни отишингиз тақиқланган давлатда яшай олмайман. #FreeCain".